Тәуелсіздік алғаннан бергі жылдар ішінде пайда болып, елге танылған, азат елдің айшықты бейнесіндей болған құрылымдар елімізде аз емес. Солардың бірі – Л.Гумилев атындағы Еуразия ұлттық университеті. Бұл университет Елбасы Нұрсұлтан Назарбаевтың ұйғарымымен 1996 жылы Ақмола қаласында құрылған болатын. Сөйтіп, ел астанасының Алматыдан Арқа төсіне көшірілуі кезінде бас қаланың ғылыми-рухани, зияткерлік ордасына айналды. Қаламен бірге өсіп, көркейді. Дамыды. Бүгінде университет еліміздегі және ТМД кеңістігіндегі танымал ЖОО-лардың бірі. Біз университет ректоры Ерлан Сыдықов мырзамен сұхбаттасып, білім мен ғылым, ЖОО-ын дамыту, университеттің жетістіктері жайлы сұрадық.
– Ерлан Бәтташұлы, биыл Тәуелсіздіктің 30 жылдығы. Жоғары білім беру саласының қандай жетістігін айтар едіңіз? – XX ғасырдың 90-жылдары әлемдегі алып империяның бірі – Кеңес Одағы ыдырап, тараған тұста, Тұңғыш Президентіміз Н.Назарбаевтың басшылығымен ежелден егемендікті көксеген ата-бабаларымыздың сол арман-тілегі, мақсат-мүддесі алғаш жүзеге асып, тәуелсіз Қазақстан мемлекеті құрылды. Міне, содан бері 30 жыл өтті. Мемлекет басшысы Қасым-Жомарт Кемелұлы айтқандай, Тәуелсіздік бәрінен қымбат! Мұны елдіктің қадірін білетін, Қазақстанның бүгіні мен болашағына қам жейтін отаншыл азаматтар тереңінен түсінеді деп ойлаймын. Өйткені ата-бабамыздың асыл мұраты, жаңғыруымыздың бастамасы болған Тәуелсіздік – өткеннің бағалысын, бүгіннің керектісін, келешектің пайдалысын сезіндіргені үшін қымбат. Бұл – Қазақстанның айбарлы биігі, тәуекел алаңы, қайрат белесі, еңбек бәсекесі, сындарлы сабақтастығы. Ал түптеп келгенде, ел іргесінің мығым болмағы білім мен ғылымға келіп тіреледі. Тарихқа да, танымға да, қоғамдық жаңғыруға да, елдік ұстанымға да, жаңашыл бағдарға да білім-ғылым қуаты керек. Осы ретте Президент Қасым-Жомарт Кемелұлының: «ХХІ ғасыр – білім мен біліктің дәуірі. Әр адам өзін үздіксіз жетілдіріп, жаңа кәсіптерді игеріп, үнемі заман ағымына бейімделу арқылы ғана бәсекелік қабілетін арттыра алады. Білім мен технология, жоғары еңбек өнімділігі ел дамуының басты қозғаушы күші болуға тиіс» деген тұжырымы жоғары мектеп саласын жаңа міндеттерге жұмылдырады. – Сіз жуырда ЕҰУ ректоры болып қайта сайландыңыз. Сайлауға қалай іріктеліп, қалай дайындалдыңыз, арнайы бағдарлама әзірлеп, сайлаушыларға ұсындыңыз ба? Қандай уәде бердіңіз? – Өздеріңізге мәлім, бұрын еліміздегі ұлттық университет ректорларын Президент тағайындайтын. Ендігі жерде ашық конкурс арқылы сайланады. Бұл еліміздегі ұлттық университеттер арасында алғаш рет болып отыр. 2021 жылғы 5 ақпан күні Премьер-Министрдің орынбасары Ералы Тоғжанов төрағалық еткен республикалық комиссия директорлар кеңесі ұсынған кандидаттармен әңгімелесу өткізіп, «Л.Гумилев атындағы Еуразия ұлттық университеті» коммерциялық емес акционерлік қоғамының Басқарма төрағасы – ректоры лауазымына үміткер ретінде конкурсқа қатысқан бес азамат әзірлеген университетті дамыту бойынша бағдарламаларды қарастырды. Дауыс беру нәтижесінде республикалық комиссия қарауына заң ғылымдарының докторы, профессор Сәуле Амандықованың және менің кандидатурам ұсынылды. Мен конкурсқа Л.Гумилев атындағы Еуразия ұлттық университетінің даму бағдарламасын ұсындым. Оны әзірлеуде екі маңызды мәселе басшылыққа алынды. Оның біріншісі, министрлік әзірлеген стратегиялық құжат – Білім мен ғылымды дамытудың 2020-2025 жылдарға арналған мемлекеттік бағдарламасы, ал екіншісі, өткен жылы қазан айында Мемлекет басшысы Қасым-Жомарт Тоқаевтың жеке қабылдауында болғанда Президенттің өзі берген тапсырмалары. Бағдарламамның негізгі қағидаты – университеттің жеткен жетістіктерін одан әрі дамыту. Университеттің дамуы 5 бағыт бойынша жүргізіледі деп жоспарланып отыр. Біріншіден, ғылым және инновациялар, коммерцияландыру және технологиялар трансферті. Ол үшін 6 ғылыми кластерді дамыту көзделіп отыр. Келесі мақсатымыз – ЕҰУ-дің экономиканың нақты секторындағы ғылымның үлесін арттыру. Екіншіден, академиялық үстемдік. Мұндағы мақсатымыз – білім беру бағдарламаларының халықаралық бағытқа бет бұруын және кадрлардың дайындық сапасын қамтамасыз ету. Үшіншіден, интернационалдандыру және халықаралық бәсекеге қабілетті арттыру. Мұндағы мақсат – ғылым мен білім беру қызметтерін интернационалдандыру. Бұл жерде әріптестік географиясы кеңейтіледі. Шет елдерде 2 филиал ашып, өзге елдердегі орталықтар мен өкілдіктерді дамытамыз. Университет базасында Орталық Азия және Еуропа университеттерінің халықаралық хабын ашамыз. Төртіншіден, білім алушылар мен оқытушылар үшін инновациялық және цифрлық экожүйе құру. Алғашқы мақсат – университеттің инфрақұрылымдық экожүйесін жаңарту. Ол үшін студенттердің жан-жақты дамуына барлық жағдай жасалады. Осы мақсатта салынып жатқан Денешынықтыру-сауықтыру кешенінің құрылысы таяу арада аяқталып, нысан ЕҰУ-дің 25 жылдығы қарсаңында пайдалануға берілмек. Сонымен бірге білім алушыларды жатақханамен толық қамтамасыз етеміз. Ол үшін инвесторлардың көмегімен жатақханалар кешенінің құрылысын бастадық, бес қабатты 2 467 орынға арналған үш заманауи Студенттер үйі кешені Ахмет Байтұрсынов және Кенен Әзірбаев көшелерінің қиылысынан бой көтеруде. Нысан 2023 жылы толық қолданысқа берілуі тиіс. Бесіншіден, басқару мен қаржыландыру жүйесінің тиімділігі мен ашықтығын арттыру. Мұның да мақсаты айқын – университеттің бәсекеге қабілеті мен дамуын қамтамасыз ету. Жаңа кадр саясаты арқылы білікті оқытушылар құрамы жасақталады. Еңбекақы төлеудің грейдингтік жүйесі енгізіледі. Сондай-ақ қаржы ресурстарын басқарудың тиімді стратегиясы әзірленеді. Бюджеттен тыс кіріс көздері әртараптандырылады. Қаржы бойынша барлық мәселе ашық болады. Бүгінде ЕҰУ оқытушыларының жалақысы – ең жоғары. Директорлар кеңесінің қолдауымен ол одан әрі де өсетініне сенімдімін.
– Соңғы кездері БҒМ бірқатар университеттердің лицензиясын қайтарып алғанын білеміз. Бұл жағдай әлі де жалғасуы мүмкін. Мұндай шараның салдарынан көптеген студент мамандықсыз, оқытушылар жұмыссыз қалмай ма? Әлде білім сапасы үшін осындай құрбандық керек пе?
– Мемлекет басшысының тапсырмасына сәйкес Білім және ғылым министрлігі елімізде жоғары оқу орындарының сапасын көтеру бойынша кешенді шаралар қабылдап жатыр. Олардың қатарында білім ордаларын оңтайландыру жұмыстары да бар. Қазақстанда жүзден астам университет болса, соңғы уақытта Білім және ғылым министрлігі 4-5 оқу орнының лицензиясын қайтарды. Оған себеп, тексеру нәтижелері көрсеткендей, жоғары оқу орындарының білім беру саласындағы заңнаманы бұзуға жол бергені. Меніңше, бұл процесс жалғасын табады әрі министрліктің қадамы дұрыс деп білемін. Әрине, бәсекелестік күшейіп, сапасыз оқу орындары сұраныстың төмендігінен нарықтан шығып қалса жөн еді. Бірақ сапаға көңіл бөлмей жатқан оқу орындарын тексеріп тұрған да дұрыс. Өйткені ЖОО сапалы білім беріп, білікті мамандар даярлауы керек. Сол мамандардың деңгейін бағалайтын жұмыс берушілермен тізе қоса әрекет етуі қажет. Осылайша, университет бітірген соң олардың жұмысқа орналасу мүмкіндігі артады. Алайда өкінішке қарай елімізде сапасыз мамандар әзірлеп жатқан университеттер бар. Сондықтан олардың лицензиясын қайтарып алу әділ болды деп ойлаймын. Министрлік жабылатын оқу орындарының студенттерін өзге білім ордаларына ауыстыру тетіктерін де ескерген. Сондықтан одан жастар зардап шекпейді.
– Жұмыс берушімен байланыс дедіңіз, ЕҰУ түлектерінің жұмысқа орналасу көрсеткіші қандай?
–ЕҰУ түлектерді жұмысқа орналастыруға көмектесу бойынша кешенді жұмыс істеп келеді. Білім ордамызда Жұмыс берушілер кеңесі құрылған, бізде серіктестеріміздің 1 440 ұйымынан тұратын жұмыс берушілер жөніндегі ақпараттық база бар. Бір ғана мысал, былтыр университет түлектерінің 87%-ы жұмысқа орналасты.
– Пандемияның басталғанына бір жылдан асты. Осы бір жыл ішінде қашықтан оқуға көштік. Студенттер де қазір онлайн оқып жатыр. Алайда көптеген студенттің әр жерде жұмыс істеп жүргені жайлы естиміз. Бұл жағдай ертең сапасыз мамандардың қатарын көбейтуге әсер етпей ме? Жалпы, онлайн оқу процесін қалай бақылап отырсыздар?
– Әлемді алаңдатқан коронавирус пандемиясы басталғаннан кейін, былтыр 16 наурыздан бастап Білім және ғылым министрі А.Аймағамбетовтің тапсырмасына сәйкес университеттер қашықтан оқытуға көшті. Л.Гумилев атындағы ЕҰУ де осы талапты қатаң сақтап, бір жылдан аса студенттер мен магистрант, докторанттарға қашықтан білім беріп келеді. Әзірліктен өткен мамандар реттелген оқу кестелеріне сай дәріс берсе, интернет желісі толық жұмыс режимінде. Профессорлық-оқытушылар құрамы білім алушылардың оқу үдерісіне бұрынғыдан да ерекше мән беріп, сабақты қашықтан оқытуды жалғастыра береді. Қалыптасқан жағдайда біз қоғам алдындағы өз жауапкершілігімізді түсінеміз. Жоғары оқу орнының әкімшілігі барлық үдерісті бақылауда ұстап отыр. Білім алушылар індетке байланысты қоғамнан оқшауланса да, олар жалғыз емес, өйткені басшылық пен сала қызметкерлері, професссор-оқытушылар құрамы әр сағат сайын, әр күн сайын бірге. Мәселен, жатақханаларымызда тегін Wi-Fi сигналы орнатылып, былтыр төтенше жағдай енгізілген кезде барлық сақтық шараларын қарастырдық. Жатақханада қалған студенттер далаға да шықпады. Оларды ұдайы бақылап отырмыз. Сондықтан өзге өңірлерден келіп, жатақханада тұрып жатқан студенттеріміз қосымша жұмыс істеген жоқ. Оған сенімдімін. Сонымен бірге білім алушылар мен олардың ата-аналары, оқытушылар мен талапкерлер үшін Call-centеr сенім телефоны жұмыс істейді. Онда студенттер кез келген уақытта, кез келген мәселелер бойынша хабарласып, сұрақтар қоюға болады. Оған міндетті түрде жауап беріледі. Қоңырауларға жай мамандар ғана емес, өзімнен бастап, барлық проректор жауап беруде.
Пандемия жағдайында үлкен жауапкершілікті өзіме ала отырып, күрделі, ерекше шешімдер де қабылдадым. Соның бірі, жетім және қамқорлыққа алынған әр студентке тамақтану үшін 54 мың теңгеден қосымша қаржы төлеу туралы шешім шығардым. Бұл қиын жағдайда үлкен демеу және өзгелерге үлгі-өнеге болды деген ойдамын.
Студенттер онлайнға көшкенімен бас әкімшілік ғимарат ашық. Қызметкерлер тізім бойынша жұмыс істейді. Жатақхана бойынша кезекшілік жүргізіледі. Жауапты саланың адамдары күнделікті еден жуып, бөлмені құрамында хлор қосылған препараттармен дезинфекциялайды. Төменгі қабатта диспенсерлер мен қолға арналған антисептиктер, медициналық маскалар қойылған.
Бүгінде университеттің басқаруында тоғыз студенттік үй, жеті оқу-зертханалық ғимарат бар. Олар да білім алушыларын күтеді.
– ЕҰУ бүгінде көптеген ғалымдар шоғырланған оқу орны ретінде белгілі. Университет ғалымдарының нақты қандай ғылыми жаңалықтары бар? Жаңалығын өндіріске енгізген немесе патент алған ғалым бар ма?
– Л.Гумилев атындағы Еуразия ұлттық университетінің алға қойған мақсаттарының бірі – ғылыми-зерттеу университеті атану. Бұл бағытта жыл сайын ғылым саласында жастардың интеллектуалдық әлеуеті артып келеді. ЕҰУ-да ғылыми-зерттеу жұмыстарына жас ғалымдардың қатысуы көңіл қуантса, дуалды техникалық және кәсіби білім берудің ұлттық жүйедегі орталығы нәтижелі жұмыс атқаруда.
ЕҰУ ғалымдары соңғы 5 жылда инновацияларды дамыту және технологияларды коммерцияландыру саласында елеулі жетістіктерге қол жеткізді. 2016 жылдан бастап қазіргі уақытқа дейін университет 60 қорғау құжаттарын алды, олардың құқық иеленушісі ЕҰУ болып саналады. Оның ішінде 17 өнертабысқа патент, 29 пайдалы модельге патент, 3 Еуразиялық патент, 2 тауар белгісіне куәлік және 9 инновациялық патент бар. Аталған жобалардың ғылыми жетекшілеріне келсек, жылу энергетикасы кафедрасының профессоры А.Әлімғазин, техника ғылымдарының кандидаты В.Ким және М.Мыңбаев., Ш.Сейілов, Д.Каргин секілді ғалымдарымызды атауға болады.
– Жыл сайын жоғары оқу орындарының отандық және халықаралық рейтингі жасалады. Отандық университеттер әлемдегі ТОП-500-дікке кірсе қуанатын болдық. Бұл біздегі білім сапасының нақты көрсеткіші ме? Рейтингтерде алғашқы жүздік, екі жүздікке кіре алмау шетелден келіп оқитын азаматтар санына кері әсер етпей ме?
– Қазір жоғары білім сапасын рейтингтер жүйесі анықтайтыны рас. Елімізде Тәуелсіз аккредиттеу және рейтинг агенттігі жыл сайын Қазақстан жоғары оқу орындарына сұраныстың ұлттық рейтингін жариялайды. Бұл рейтингке қатысу үшін республика бойынша жүзге жуық ЖОО өтінім береді, екі мыңдай білім беру бағдарламасы тіркеледі. Ұлттық рейтингте Л.Гумилев атындағы Еуразия ұлттық университеті көп жылдан бері көш басында келеді. Жиырма бес жыл бойы жоғары білім беру саласындағы қажымас еңбек өз жемісін беруде.
Қазір Л.Гумилев атындағы Еуразия ұлттық университеті – QS «TOP 50 under 50» атты құрылғанына 50 жыл толмаған алдыңғы әлем университеттерінің қатарына кірген ТМД бойынша жалғыз жоғары оқу орны. Бұл тізімнің ішінде Гонконг, Сингапур, Оңтүстік Корея, Малайзия, АҚШ, Испания, Нидерланд, Финляндия, Швеция, Бельгия, Ұлыбритания, Канада, Жапония, Германия, Норвегия, Дания, Италия, Израиль, Франция және Сауд Арабиясының жоғары білім беру ордалары бар. Сонымен қатар халықаралық өзге рейтингтерде де ЕҰУ жыл сайын көрсеткішін жақсартып келеді. Біздің пайымдауымызша, құрылғанына 25 жыл ғана болған оқу орнының бұл көрсеткіштері жаман емес әрі шетелдік жастарды қызықтыруға азды-көпті септігін тигізіп жатыр. Соңғы 4 жылдың ішінде университетімізге шетелден келіп оқып жүрген студенттер саны 3 есе көбейді. Кейде рейтингтен гөрі осындай статистика нақты көрсеткіш болады. Ал жаһандық рейтингтерге тарихы жүздеген жылдарға кететін, ғылыми-техникалық базасы өте қуатты, әлемдегі дамыған елдердің көшбасшы оқу орындары да кіретінін ескеру керек.
– Мектепте жұмыс істейтін педагогтердің жалақысын мемлекет кезең-кезеңімен өсіріп жатыр. 2001 жылдан бері солай. Ал жоғары оқу орындары акционерлік қоғамдарға айналып жатыр. Бұл жағдай университет оқытушыларының табысын өсіруге кері әсер етпей ме? Оқытушы-профессорлық құрамға жақсы жалақы төлеу үшін оларды қысқартуға мәжбүр болмайсыздар ма?
– Коммерциялық емес акционерлік қоғам болып құрылу қызметкерлер жалақысын өсіруге кедергі емес. Өйткені Білім және ғылым министрі Асхат Аймағамбетовтің ЖОО оқытушыларының жалақысын арттыру туралы шешімі бар. Жалпы, жоғары білім беру сапасын арттырудың маңызды шарты – оқытушылар үшін тиісті еңбек жағдайларын, оның ішінде лайықты жалақыны жасау. Бұл туралы ел Президенті Қ.Тоқаевтың жоғары оқу орындарындағы оқытушы-профессор құрамының жалақысын көтеру жөнінде тапсырмасы бар. Сондықтан министр 2021 жылдың қыркүйегінен бастап штаттағы оқытушы айына кемінде 200 мың теңге, аға оқытушы – 230 мың теңге, қауымдастырылған профессор – 260 мың теңге, профессор – 350 мың теңге (ұлттық университеттерде – 400 мың теңге) алуы керегін мәлімдеді. Бұл ең төменгі жалақы ғана. Сонымен қатар әр университет басқа ынталандыру төлемдерін белгілеп, оқытушылардың белгілі бір жетістіктері үшін ақы төлей алады. Бұл орайда біздің Еуразия ұлттық университетінде оқытушылар мен профессорлар құрамы және сала қызметкерлерінің жалақысы уақыттан қалмай көтерілді.
Еуразия ұлттық университеті қазір жүз пайыз мемлекеттің қатысуымен КеАҚ болып қайта құрылған білім ордасы. КеАҚ – өз қызметінің негізгі мақсаты ретінде табыс алуды көздемейтін және алынған таза табысты бөлуді жүзеге асырмайтын коммерциялық емес ұйым. Барлық алынған табыс жоғары оқу орнын дамытуға, атап айтқанда зертханалық базаны жабдықтауға, оқытушылардың жалақысын арттыруға, жоғары оқу орнының инфрақұрылымын дамытуға жұмсалады. Бір сөзбен айтқанда, жоғары оқу орындарының КеАҚ-на көшуі – жоғары білім берудің барлық жүйесін дамытудағы жаңа кезең.
Бүгінгі таңда жоғары оқу орындарына шет елдерде филиалдар, эндаумент-қорлар құру, стартап-компаниялар ашу, сондай-ақ жарғылық қызметті жүзеге асыру үшін қосымша қаржы және материалдық қаражат көздерін тарту құқығы берілген. Соның нәтижесінде ЖОО-лардың академиялық дербестігі артып, қаншама ЖОО-лар дербес әзірлеген білім беру бағдарламасы енгізілді. Мұның бәрі жоғары оқу орындарының академиялық еркіндігін одан әрі кеңейтуді талап етеді. Ал оқытушы-профессорлық құрамға келсек, олардың саны қысқартылмайды, жалақылары жаңа оқу жылына қабылданатын студенттердің мемлекеттік гранты есебінен сақталады. ЕҰУ-ға тиесілі мемлекеттік білім беру грант ысанының көбі еліміздің ертеңі мен келешегі үшін қызмет ететін мамандықтарға бағытталады. Республика көлемінде салыстырмалы түрде алғанда, бұл – ең жоғары нәтиже. Басқасын айтпағанда, ЕҰУ – ақпаратты криптографикалық қорғау құралдарын іске асыратын және дайындайтын лицензиясы бар Қазақстандағы жалғыз оқу орны. Жыл сайын студент-жастардың сапалық құрамына ерекше көңіл бөледі. Құқықтану, халықаралық құқық, халықаралық қатынастар, экономика, қаржы, есеп және аудит, менеджмент мамандықтары бойынша өту ұпайы жоғары.
– Мамырда Л.Гумилев атындағы ЕҰУ-дың құрылғанына 25 жыл толады. Ширек ғасырда оқу орны қандай жетістікке жетті? Оқу орны елордаға жастарды тартатын «магниттердің» бірі еді. Қазір сол миссиясын қалай атқарып жатыр?
– Л.Гумилев атындағы Еуразия ұлттық университеті осыдан ширек ғасыр бұрын Қазақстанның Тұңғыш Президенті – Елбасы Нұрсұлтан Назарбаевтың пәрменімен екі жоғары оқу орны – Целиноград инженерлік-құрылыс институты мен Целиноград педагогикалық институтының бірігуі негізінде құрылған. Сол жылдары мұнда 5 мыңдай ғана студент оқып, 300-ге жуық оқытушы жұмыс істесе, бүгінде Еуразия ұлттық университеті қала ішіндегі қалаға айналды.
Қазір мықты инфрақұрылымдарымен, оқу-лабораториялық ғимараттарымен, ғылыми-зерттеу институттарымен, әлеуметтік әрі мәдени бағыттағы нысандармен толыққан оқу ордасы. Қазір мұнда 20 000-нан аса студент білім алады, 3 500-ден астам қызметкер жұмыс істейді, олардың 1 500-і профессор-оқытушы құрамының өкілдері болып саналады.
ЕҰУ ресми деңгейде әлемнің 200 жоғары оқу орнымен байланыс орнатқан. Күні бүгінге дейін университетімізге әлемнің 45 мемлекетінен 1 000-нан аса шетел маманы келіп дәріс оқыды. Президенттің «Болашақ» стипендиясы арқылы 100 шақты студент шетелдік ЖОО-да білім алып, 300-ден аса профессор-оқытушы құрамы ғылыми тағылымдамадан өтті.
Соңғы бес жылда білім алушылар саны 42%-ға артса, бұл жастардың Еуразия ұлттық университетіне, оның сапалы біліміне, кәсіби тәсіліне үлкен қызығушылық тудыратынын білдіреді.
ЕҰУ көп жылдан бері Еуропалық Одақтың білім мен тәжірибені жетілдіруді мақсат ететін Эразмус Мундус бағдарламасының академиялық алмасу жобасына қатысып келеді. Бұл бағдарламаның грантын жеңіп алу бойынша да ЕҰУ Орталық Азия университеттері арасында алдыңғы шепке шығып, отандық ЖОО арасында оқ бойы озық тұр.
Университетіміздің халықаралық бағдарламалар және магистратура бөлімдері Болгария, Литва, Румыния, Словакия, Оңтүстік Корея, Малайзия, Түркия және ТМД елдерімен академиялық алмасулар жүйесі шеңберінде жұмыс істеп келеді. Осы жүйе бойынша магистрлеріміз білімін шетелдерде жалғастырып жатыр.
Тағы бір діттегеніміз – әлемнің ең озық мемлекеттер қатарына кіру және ұлттық университетті халықаралық 200 озық ЖОО қатарына қосу. Мемлекет пен басшылықтың бүгінде білім беру саласына көңіл бөліп отырғаны қазақстандық ЖОО-ларды халықаралық деңгейге шығаруға мүмкіндік береді. Ал 25 жылдық тарихы бар Л.Гумилев атындағы ЕҰУ соңғы жылдары қарқынды жұмыс істеу арқылы халықаралық білім беру кеңістігінде нық бекіп алды.
Тәуелсіз Қазақстанда туған жас ұрпақтың білімге деген махаббатын бәсеңдетіп алмас үшін әлемнің кез келген түкпіріне терезе ашып, байланыс құрып, дамыған елдердің жастарымен терезесі тең түлектер ұшыруды алдына мақсат етіп ұстаған оқу ордамыз бір сәт те қарқынын баяулатпақ емес.
– Әңгімеңізге рақмет!
Сұхбаттасқан Амангелді ҚҰРМЕТ