Алматы облысының бас мемлекеттік санитар дәрігері Ерғали Сыдымановтың кейбір шектеу шараларын күшейту туралы жаңа қаулысы жарияланды.
Аталған қаулы бойынша, мектеп оқушылары қашықтан оқыту форматына көшеді. «Меншiктiң барлық нысанындағы орта бiлiм беру объектiлерiнiң оқушыларын дәстүрлі форматта оқытуды тоқтата тұру және оқытуды қашықтан (онлайн) режимге көшіру. Интернет байланысы жұмыс істемейтін немесе үзіліспен жұмыс істейтін шалғай елді мекендерде сыныптарды 25 адамнан аспайтын жинақпен, маска тағу режимін және әлеуметтік қашықтықты сақтай отырып, дәстүрлі форматта оқытуға рұқсат етіледі», – деп жазылған қаулыда. Оған қоса, Алматы облысында республикалық олимпиадаларды өткізуге рұқсат берілді. Айте кетерлігі, әр кабинетте 15 оқушыдан артық болмауы керек. Олар шахматтық тәртіпте отырғызылып, маска тағу режимін және кемінде екі метр әлеуметтік қашықтықты сақтауы шарт. Сондай-ақ Ерғали Сыдыманов үй-жайларды ауаны залалсыздандыруға арналған құралдармен жабдықтауды ұсынды.А.ЖОЛДАС