«Nur Otan» партиясының Алматы қаласы бойынша сайлауалды бағдарламасында 2 800 үйді табиғи газға көшіруді аяқтау мәселесі қарастырылды. 2021 жылы бұл көрсеткіш шамамен 1 800 үйді қамтуы тиіс.
Бұл жайында партияның Алматы қалалық филиалы жанындағы Экологиялық кеңестің кезекті отырысында кеңес төрайымы Алтынай Көбеева баяндады. Отырыс барысында кеңес мүшелері тарапынан «Газды қосуға пайызсыз несие» бағдарламасының халық арасында танылу деңгейінің төмендігі және бағдарламаның ақпараттық ресурстарын көбейту бойынша қалалық Энерготиімділік және инфрақұрылымдық даму басқармасына ұсыныстар жасалды. Сонымен қатар сайлауалды бағдарламаның Жол картасы аясында 2025 жылға дейін 1 млн ағаш отырғызу мәселесі бойынша қалалық Жасыл экономика басқармасы төрағасының орынбасары А.Темешев баяндама жасады. – 2021 жылы қала көлемінде 360 мың көшет отырғызу қарастырылған. Жоспарға сәйкес қазір 51 мыңға жуық көшет отырғызылды және мамыр айының орта тұсына дейін бұл көрсеткішті 64 мыңға дейін жеткіземіз. Сондай-ақ қалған 300 мыңға жуық көшетті күздік кезеңде отырғызу жоспарланды, – деді А.Темешев. Кеңес мүшесі Т.Елеусізов жер учаскелерін мақсатсыз пайдаланған және игерілмей тұрған жерлердің меншік иелерін жауапқа тарту керегін және бұл мәселелер қаланың көркеюіне кері әсерін тигізетінін атап өтті. Жиын соңында кеңес төрайымы Алтынай Көбеева басқарма өкілдеріне, отырыс барысында кеңес мүшелері тарапынан айтылған ұсыныстар мен ескертулерді уақытылы және сапалы түрде орындауды тапсырды.Әбілмансұр ЖАСАН