Шымкент қаласындағы «Арбат» алаңында мерекеге орай «Nur Otan» партиясы Шымкент қалалық филиалы жанындағы Отбасы, әйелдер мәселелері және балалардың құқықтарын қорғау жөніндегі қоғамдық кеңес пен қалалық Мәдениет басқармасының ұйымдастыруымен «Әлем балалармен әдемі» атты іс-шара өтті.
Бүлдіршіндерге арналған игі шараға арнайы қатысқан «Nur Otan» партиясы Шымкент қалалық филиалы төрағасының бірінші орынбасары Жанар Бектаева өскелең ұрпақтың мемлекет болашағын қалыптастырудағы маңыздылығына айрықша тоқталып, жас буынның кемел келешегіне тілектестігін білдірді. – Бүгінде қаламызда 526 балабақша, 186 мектеп жұмыс істейді. Алдағы бес жылдың ішінде қаламызда 72 мектептің құрылысы жүргізілгелі отыр. Бұл 3 ауысымды мектептердің санын азайтып, балалардың сапалы білім алуына мүмкіндік береді. Балдырғандарымыздың дені сау, армандары асқақ, пайым-парасаты биік тұлға болып қалыптаса беруіне «Nur Otan» партиясы әрдайым қолдау білдіреді, – деді Жанар Әлібекқызы. Ол сонымен қатар аталған жиынның негізгі мақсаты – балалардың құқығын қорғау, денсаулығын сақтау, оларға қоғам болып қолдау көрсету, сапалы білім алуына жағдай жасау және саналы ел азаматы болып қалыптасуына үлес қосу екенін атап өтті. Думанды шара барысында балаларға тәттілер үлестіріліп, сыйлықтар тарту етілді. Сондай-ақ қуыршақтар театры арнайы сахналық қойылымдар қою арқылы балдырғандардың көңілін сергітіп, көтеріңкі көңіл күй сыйлады.Әбілмансұр ЖАСАН