Еңбекшіқазақ ауданының Сөгеті ауылдық округіне қарасты аумақтағы Бұғыты тауларында вольфрам кенін байыту және қайта өңдеу бойынша аса ірі инвестициялық жоба жүзеге асырылмақ. Қазір мұнда «Жетісу Вольфрам» ЖШС тапсырысымен тау-кен байыту фабрикасының құрылысы басталды. Жобаны шетелдік инвестордың қатысуымен орындау жоспарланған.
Жобаның жүзеге асырылу мерзімі – 2021-2023 жыл. Жалпы сомасы – 945 млн 500 мың теңге. Қайта өңдеуді қоса алғандағы қуаттылығы – жылына 3 млн 300 мың тонна кен. Жобаның негізгі мақсаты – өндірілген кеннен металл бұйымдарын дайындау кезінде оның сапасын арттыратын концентрат әзірлеп, оны одан ары ішкі және сыртқы нарыққа сатуға шығару. «Жетісу Вольфрам» ЖШС халықты жұмыспен қамтуға және қазынаны толықтыруға оң әсер етуге тиісті маңызды жобаны құрылтайшы Jiaxin International Resources Investment Limited (ҚХР) компаниясымен бірлесе жүзеге асырады. Бүгінде жобаның І кезеңі орындалуда. Дайындық жұмыстарына жергілікті тұрғындар қатарынан 30 адам және көрші елден шақырылған 2 маман тартылған. Жұмысшылардың айлық жалақысы – 250 мың теңге. Басты жұмыстар басталған кезде ауданның 175 тұрғыны жұмысқа орналасып, 50 адам фабрикаға қажетті мамандық бойынша оқытылады.Болат АБАҒАН, Алматы облысы