70 миллион теңгенің актісіне қол қойылды
«Қосшылықтар 5 маусым күні мердігер құрылыс компаниясына Республика көшесінен 70 миллион теңге сомасына орындалған жұмыс актісіне қол қойылғанын білді. Бірақ ол жердегі жұмыстарға, шын мәнінде 1 миллион теңге де жұмсалған жоқ. Қопарылған бордюр, аударылып-төңкерілген тротуардан жаяу адам жүріп өтуі қиын. Енді жақында қол қойылған орындалған жұмыс актілерінен кейін аудан әкімдігі мердігер компанияны сотқа берді. Ал соттың қашан аяқталатыны белгісіз. Бұл біздің баспанамыздың тағдырының шешілуіне де кері әсерін тигізетіні анық», – дейді Ирина Дюсекеева есімді Diamond Park тұрғыны.Үнімізді Президентке дейін жеткіземіз!
Тұрғындар Қосшыдағы қордаланған көп мәселелерді шешудің жалғыз жолы – ауылдың елордаға қосылуы деп біледі. Әлеуметтік желілерге осылай үн қатқан тұрғындар рұқсат етілген митингке шығып, Президентке үндеу жазып, барлық деңгейдегі әкімдерге сенімсіздіктерін ашық білдірмек. «Біздің әлеуметтік желілерде өзіміздің жеке парақшамыз бар. Барлық толғағы жеткен күрделі әрі өткір мәселеміз сонда талқыға салынады. Жақында ғана рұқсат етілген митинг өткізуге және Мемлекет басшысы Қасым-Жомарт Тоқаевқа бейнеүндеу жариялауға шешім қабылданды. Мұнымен қоса, барлық деңгейдегі әкімдерге ашық түрде сенімсіздік білдіреміз», – дейді Ирина Дюсекеева. Тұрғындардың ауыр толғанысын тудырған жайдың жағдайын ауданның әкімінен білмек болдық. Бірақ аудан әкімімен тілдесу мүмкін болмады. Сауалымызға аудан әкімінің орынбасары Қанат Ағзамұлы өз жауабын ұсынды. «Облыс әкімі Ермек Маржықпаев мұнда болып жатқан барлық жағдайдан хабардар. Бірақ халықпен мәселенің бәрін біржақты етіп толық шешкен кезде бір-ақ кездеспек ниетте. Жақында прокуратура, мүдделі органдар, жердің иесі және құрылыс компаниясы өкілдерімен жиын өткізілді. Қазір бұл мәселе бойынша қылмыстық іс қозғалды. Жер иесі мен құрылыс салушы компаниялар («Азбука Жилья», «Астана Строй» ЖШС, тағы басқа) арасында жердің ақшасы төленбеді деген дау бар. Жер иесі өзіне ақшасының төленгенін талап етіп отыр. Мәселе енді тек сот арқылы шешімін табуы мүмкін. Біздің қолымызда емес», – дейді Целиноград ауданы әкімінің орынбасары Қанат Ағзамұлы. Мәселені жер учаскелерін құрылыс салуға беріп, тұрғын үй салынғаннан кейін барып ақшасын іздеген жер иесімен де тілдестік. Оның айтуынша, кезінде ол сенім білдіріп, құрылыс салуға жерін берген. Енді құрылыс салушыдан тиісті ақшасын төленуді талап етіп отыр.170 миллион теңгемді төлесін!
«Менен несін сұрайсыз? Мен жеріме ақшамды ала алмай отырмын. Құрылыс иесі маған ақшамды төлемей отыр. 170 миллион теңге менің қарызымды төлесін. Үйлерін сатсын, меншіктегі құрылысын сатсын, бірақ менің ақшамды қайтаруы тиіс. Барлық мәселе жақында облыс әкімімен өткен кездесуде де, оған дейін де талай айтылды. Осындай жағдайдың туындағанына менің қатысым қанша? Сұрағыңызды құрылыс салған компанияға қойыңыз. Мен өз ақшамды ала алмай жүрген адам- мын», – дейді Diamond Park тұрғын үй құрылысы салынып тасталған жердің иесі Андрей Боргенс. Сонымен, таяқтың барлық ұшы 20 үйді заңсыз салған құрылыс компаниясына тірелді. Бірақ қанша рет тілдеспек болған әрекетімізден түк шықпады. Мердігер компания иесі Арнай мырзамыз телефонын көтермеді. Ал әкіммен өткен кездесу барысында аталған мәселе жөнінде ол былай деді: «Мен 20 үйдің 18-ін толығымен тапсырдым. Барлық пәтер кілтін тұрғындарға тапсырдым», – деді ол жиында сөйлеген сөзінде. Бірақ тұрғындардың мұнымен келіскісі жоқ. «Оның барлық айтқан сөздері толығымен жалған. Ол тек 39, 38, 73-үйлерді салды. Салынғанымен бұлардың бәрі салынуы жағынан да, құжаттары жағынан да заңбұзушылық жетерлік. 19, 20, 11-үйлер аяқталмаған. Жер сатып алынбаса да пәтер сатылған. Тағы 40 және 41-үйлер бар. Олар тіпті де салынбаған. Жерді де сатып алмаған. Барлық заңбұзушылықтарды көрсетсек те ол құрылысты салған мен емес деп шықты. Қазір 16-үйде адамдар тұрып жатыр. Міне, осындай тұйық шеңберге айналған жағдай», – дейді Ирина Дюсекеева.P.S.
Сонымен, елордадан 10 шақырым жердегі Қосшы ауылындағы Diamond Park мәселесі жылдарға созылса да шешім табуының ауылы әлі алыс сияқты. Толғағы жеткен жағдайды облыс әкімі тікелей бақылауына алыпты. Түйін тарқатыла ма? Бұл келер күннің еншісінде...
Абзал АЛПЫСБАЙҰЛЫ, Ақмола облысы