Еліміздің бірнеше өңірін қуаңшылық жайлап, тұрғындар төрт түлігіне жаз айының өзінде жемшөп тауып бере алмай қиналып жүр. Қыстың қытымырлығы мен қардың аз түсуі, өзендердің тоспаларға толып кетуі ағын судың азаюына әсер еткені негізгі себеп ретінде айтылғанымен, өткен жылы мал азығын қамдауда қапы кеткен тұстардың барлығы да анық. Осы орайда Алматы облысы биыл қысқа мал азығын әзірлеуге тыңғылықты дайындықпен келіп, алғашқы орақтан соң алдағы мүмкіндіктерді де бір саралап алғанын айта кеткен жөн.
Биыл мал азығына арналған дақылдар өсірілетін алқаптардың көлемі өткен жылмен салыстырғанда 7,1 мың гектарға артып, 257,9 мың гектарға жетіпті. Алдағы қыста төрт түлік тілін тістеп қалмауы үшін 3,5 млн тонна шөп, 1,3 млн тонна пішендеме, 684 мың тонна жемдік астық дайындау жоспарланыпты. Қазір көпжылдық дақылдардың алғашқы шабуы, яғни бірінші орақ аяқталып, 418,1 мың тонна шөп, соның ішінде 285,2 мың тонна жоңышқа дайындалыпты. Соңғы күндері жауын-шашын да жиілеп, келесі шабыстың да табысты боларына сенім арта түскен. Сонымен бірге күздіктің шығымы да жаман емес. Астықты төкпей-шашпай жинап алуға әзірлік те ойдағыдай көрінеді.
Алматы облыстық Ауыл шаруашылығы басқармасының мәліметінше, қазір 771 мың тонна сыйымдылықтағы 265 қамба астық қабылдауға дайын тұр, соның ішіндегі екеуі арнайы лицензиясы бар, 58,6 мың тонна астық қабылдайтын мамандандырылған кәсіпорын.
Күздік дақылдардың көлемі өткен жылға қарағанда 2,5 мың гектарға ұлғайтылып, 105,9 мың гектарға жеткен. Ерте пісетін дақылды ору науқаны 10 шілдеде басталады деп болжанып отыр. Күздікті қоса алғанда, өңірдегі дәнді дақылдарды жинауға 1 468 комбайн, 180 механикалық қырман, 263 астық тиегіш, 203 дәнатқы, 164 астық тазалағыш машина, 256 автотаразы дайын. Орақ жұмыстарын дер кезінде әрі сапалы атқару мақсатында Ауыл шаруашылығы министрлігіне 13,8 мың тонна дизель отынын бөлу туралы өтінім жасалыпты.
Болат Абаған,
Алматы облысы