Қызылордадағы келеңсіздіктерге шарқ ұрып әділдік іздеген тұрғындар «Nur Otan» партиясының пәрменімен талай тірлікті тіктеп жатқаны жасырын емес. Көзге көріне бермейтін қоғамдағы олқылықтар мен күн тәртібінен түспей тұрған түйткілді мәселелердің түйіні де осы партия қабырғасында тарқатылып жатқаның бірі білсе, бірі білмес, сірә. Айталық...
Таяуда «Nur Otan»-ның сайлауалды бағдарламасының нақты бағыттарын іске асыруға, үйлестірілген жұмыстарды бақылауға негізделген партия жанынан 12 қоғамдық кеңес құрылды. Аталған қоғамдық кеңестер партия Төрағасының алға қойған міндеттерін ескере отырып, бюджет қаражатының тиімді және ашық жұмсалуына мониторинг жасауды қамтамасыз етеді.
Әр саланы қамтыған 10-нан аса қоғамдық кеңестің жүйелі жұмыстарының нәтижесінде көшбасшы партияның пәрмені одан әрі арта түсті десек те артық айтқандық емес. Қарапайым халықтың тілімен айтсақ, «мәселені шешетін» ұйымға айналды.
КҮРМЕЛГЕН ТҮЙІН ТАРҚАТЫЛМАҚ
Қызылорда қаласына қарасты Абай ауылы тұрғындарының ауылдың іргесінен өткен көгілдір отынның игілігін көре алмай отырғандарына он шақты жыл болды. Бұл мәселе жылда қозғалғанымен 600-ге жуық түтіні бар ауылға газ әлі келген жоқ. Осы мәселені көтеріп, газетіміздің өткен санында «Құрғақ уәде халықты қажытты» тақырыбында мақала жарық көрді. Аймақтағы әрбір істің оң шешімін табуға ықпал етіп жүрген нұротандықтар бұл мәселені де тұрғындардың пайдасына шешілуін бақылауға алғаны ауыл жұртын бір серпілтіп тастады.
Тұрғындардың айтуынша, ауыл әкімі осыдан 4 жыл бұрын әр шаңырақ табиғи газдың рахатын көреді деп сөз берген екен. Бірақ әдеттегідей уәде сол күйі орындалмай, жұрт әлі күнге көмір жағып, күл шығарып жүр. Осылай деп ашынған тұрғындар «Nur Otan» партиясының облыстық филиалына барып, елді мекенге газ желісі тартылмай жатқанын жеткізді.
«Nur Otan» партиясы Қызылорда облыстық филиалынан: «Абай ауылы тұрғындары партия Төрағасының Бірінші орынбасарының қабылдауында болып, газ мәселесін жеткізді. Бұл жағдайды «Nur Otan» партиясы өз бақылауына алды. Ауылішілік газ құбырын тарту жұмыстарына қажетті қаражат бөлу жайы сессия отырысына ұсынылады» деген абайлықтар үшін жағымды хабар келді.
ШИЕЛІДЕ ЖЕМҚОРЛЫҚ ТЫЙЫЛМАЙ ТҰР
Бұл туралы партия жанындағы Сыбайлас жемқорлыққа қарсы іс-қимыл жөніндегі қоғамдық кеңес отырысында талқыланды.
Статистикалық мәліметтерге сүйенсек, 2020 жылы облыс көлемінде сыбайлас жемқорлық сипатындағы қылмыстық құқықбұзушылықтардың тіркелуі 2019 жылмен салыстырғанда 130-дан 90-ға дейін, яғни 30,8% азайған. Ағымдағы жылдың 4 айында облыс көлемінде сыбайлас жемқорлық сипатындағы қылмыстық құқықбұзушылықтардың тіркелуі өткен жылдың осы кезеңімен салыстырғанда 53,4% азайғандығы байқалады, яғни 58-ден 27-ге төмендеген. Дегенмен, 2020 жылы Шиелі ауданы бойынша сыбайлас жемқорлық сипатындағы қылмыстық құқықбұзушылықтардың тіркелуі 2019 жылымен салыстырғанда 1-ден 2-ге дейін, яғни 100% өскен болса, осы жылдың 4 айында 0-ден 3-ке дейін көбейіп отыр.
Мұнан бөлек, Қазақстан Мемлекеттік қызмет істері агенттігінің Қызылорда облысы бойынша департаментінің мәліметіне сәйкес 2020 жылы және 2021 жылдың қаңтар-мамыр айларында Шиелі ауданының жергілікті атқарушы органдарының лауазымды тұлғаларына қатысты қозғалған тәртіптік істер мен жауапкершілікке тартылған тұлғалар да аз емес.
Оның ішінде әлеуметтік желіде резонанс алған мәселелер, карантин талаптарын бұзған мемлекеттік қызметшілер саны, әкімшілік құқықбұзушылық фактілері де жетерлік.
Бұл ретте, кеңес мүшелері Шиелі ауданы бойынша сыбайлас жемқорлық сипатындағы құқықбұзушылықтың облыс көлемінде алдыңғы қатарда екенін ескеріп, аудан әкімінің өз қызметкерлеріне бақылау жасау, жұмысты үйлестіру деңгейінің төмендігін алға тарта отырып, партиялық жауапкершілігін Партиялық бақылау комиссиясының отырысында қарауды ұсынды. Ұсынып қана қоймай, сыбайлас жемқорлық тәуекелдерін анықтау бойынша талдау жұмысына аса мән берілу керегін тағы бір ескертті.
ПАРТИЯНЫҢ АРАЛАСУЫМЕН ЖАЛАҚЫСЫН АЛДЫ
Мемлекет басшысы мүмкіндігі шектеулі жандардың қоғам өміріне белсенді араласуына жағдай жасап, олардың құқықтарының қорғалуы төңірегінде заңнаманың сақталуын барлық құзырлы органдарға міндеттеген болатын. Бұл бағытта да Қызылордадағы партия филиалының басшылығы қоғамдық-партиялық мониторинг жүргізіп, мүмкіндігі шектеулі азаматтар үшін қолжетімді орта қалыптастыруға өз үлесін қосып келеді. «Кедергісіз келешек» жобасы аясында партия филиалынан құрылған партиялық бақылау комиссия мүшелері әлеуметтік нысандарға барып, мүмкіндігі шектеулі азаматтар үшін бейімділігіне тексеру жұмыстарын ұдайы жүргізіп отыр. Кейбір ғимаратқа кіретін арнайы пандустардың талапқа сәйкес келмейтіні анықталып, мекеме басшыларына ескерту берілетін жайттар да көп кездеседі.
Иә, қоғамда түрлі мәселелер бар. Соның ішінде, кісі ақысын жеп, жұмысшыларына келісілген қаржыны беруге құлықсыз жандар да кездеседі. Жалдамалы жұмыс істеп, еңбекақысын ала алмай, әбігерге түскен жандар да партия есігін қаққан. Қоғамдағы олқылыққа бейжай қарай алмаған нұротандықтар дереу тексеріс жүргізіп, мәселенің оң шешімін табуға ықпал еткен.
Ал қарттарымызды қадірлеуге, үлкенге ізет, құрмет көрсетуге және олардың ғибратқа толы өмір жолын жастарға үлгі ететін партияда «Ардагерлерді ардақтайық» жобасы бар. Жоба аясында жалғызбасты және әлеуметтік аз қамтамасыз етілген тыл ардагерлерінің үйіне түрлі көмек тұрақты түрде көрсетіліп келеді. Сонымен бірге, «Кедергісіз келешек», «Ұлы Дала Қазынасы», «Бақытты отбасы – бақытты балалық шақ», «Тарлан тарих тағылымы», «Сәтті қадам», «Жастар – Отанға!» және басқа да партиялық жобалар аясында біршама игілікті істер атқарылып келеді.
Н.ҚАЗБЕКОВ,
Қызылорда облысы