Алаяқтық әрекеттердің жиілеп кетуіне байланысты «Азаматтарға арналған үкімет» ХҚКО қызметкерлерінің клиенттерге қоңырау шалмайтынын және қарыздарын өтеуді немесе төлқұжат деректерін тексеруді сұрамайтынын ескертті.
Сонымен қатар мемлекеттік корпорация қызметкерлері борышкерлердің деректер базасын көрмейтінін, азаматтардың банк шоттарын бұғаттай алмайтынын және шет елге шығуға тыйым сала алмайтынын хабарлайды.
"Клиенттермен барлық қарым-қатынас тек 1414 Бірыңғай байланыс орталығы арқылы жүзеге асырылады", - делінген баспасөз қызметінің мәліметінде.
SMS-хабарлама арқылы клиенттерге брондау уақыты, құжаттардың қолданыс мерзімінің аяқталуы, мемлекеттік қызметтер бойынша берген өтініштерінің нәтижесі туралы хабарланады.
"Біз қазақстандықтарды қырағылық танытуды және бөгде адамдарға өздерінің төлқұжат деректерін немесе цифрлы қолтаңбаларын бермеуді сұраймыз. Сіздің жеке кабинетіңізге кіре отырып, алаяқтар сіз туралы ақпаратты өзінің жеке мүддесіне пайдалануы мүмкін", - деп аталып өткен хабарламада.
