Сервистік орталықты 2002 жылдан бері «John Deere» компаниясының Қазақстандағы ұлттық дилері – Eurasia Group компаниясы салған. Компания күні бүгінге дейін Қазақстан аумағында ауыл шаруашылығы тауар өндірушілеріне 12 мыңнан астам заманауи техникалар жеткізді. Бүгінде еліміздің 14 өңірінде өз өкілдіктерін ашқан іргелі кәсіпорынның экономика саласына қосқан тікелей инвестициясының көлемі 65 миллион доллардан асып жығылған. Қазіргі сәтте «John Deere» техникаларымен республиканың егістік алқаптарының 20 пайыздан астамы егіліп, егін ору науқанында 25 пайыздан астамы орылатын болған, ал 2,3 миллион гектары «John Deere» техникасымен цифрландырылған.
Облыс және республикалық БАҚ өкілдерімен өткен кездесу барысында ТМД елдерінде ең ірі сервистік орталықтың жұмысы аталып өтті. Қызмет көрсететін сервистік орталық техниканы сатып алған тұтынушыларға қызмет көрсету сапасын жақсартып қана қоймай, елдің ауылшаруашылық саласының дамуына да елеулі ықпал етпек.
10 гектардан асатын аумақты алып жатқан алып аутлеттің ішінде әкімшілік кеңселермен қатар қосалқы бөлшектер қоймасы, кадрларды оқыту және біліктілігін арттыратын арнайы оқыту сыныптары мен ауыл шаруашылығы техникаларын күрделі жөндеу орталықтары салынған. Ал сервистік орталықтың басты ерекшеліктерінің бірі орталық заманауи технологияларға сай цифрландыру және автоматтандыру процестерін оңтайлы қолдануға бағытталған. Сондай-ақ, техникаларға арналған ашық және жабық көрме алаңдары да жабдықталыпты.
Журналистермен ұйымдастырылған баспасөз конференциясы барысында компанияның сатылымға ұсынған ауыл шаруашылығы техникаларының қолжетімділігі мен жалға алу мүмкіндігі туралы сауалдар қойылды.
«Бұл Орта Азия елдері арасындағы ең ірі сервистік орталық болып отыр. Бұдан бөлек, бізде осыған дейін Қостанай қаласында сервистік орталық ашылған. Әрине, оның көлемі бұдан әлдеқайда кішірек болғанымен, көрсетілетін функционалдық қызметі бірдей. Дегенмен, біздің есебімізше, Көкшетау – әлем орталығы. Өйткені, бұл қала аграрлық өңірлердің дәл ортасында орналасқан. Ал бұл өз кезегінде заманауи технологиямен қызмет көрсететін ірі сервистік орталықты ашуымызға түрткі болды. Білікті кадрлардың тапшылығы - қазіргі таңда барлық ауыл шаруашылығы саласын алаңдатып отырған күрделі мәселе. Біз бұл орайда, Қазақстанның бірқатар жоғары оқу орындарымен келісе отырып, біршама студенттерді іс-тәжірибеден өткізіп, одан әрі жұмысқа қабылдап жатырмыз. Қазіргі уақытта штатта 400-ден астам адам бар. Сондай-ақ, жұмыстардың басым бөлігі цифрландырылған жүйеде, - дейді «Евразия Групп Қазақстан» компаниясының бас директоры Сергей Глокке.Компания бас директорының айтуынша, компания жұмыстың 50 пайызын адамның көмегінсіз орындайтын техникаларды сатады. Ол 2004 жылдан бастап жеткізілген көптеген техникалардың сатылымнан кейін жөндеуді және қызмет көрсетуді қажет ететінін атап өтті. Жаңа сервистік орталық мұндай мәселелерді жылдам әрі сапалы түрде шешуге мүмкіндік бермек.
Жиын барысында ауыл шаруашылығы компаниялары мен шағын фермерлік шаруашылықтар үшін ауыл шаруашылығы бағдарламалары арқылы лизингтер мен несиелер алу тәсілдері де қаралды.
Сервистік орталықтың ашылу салтанатында сөз сөйлеген Ақмола облысының әкімі Ермек Маржықпаев өңірдің ауыл шаруашылығында қол жеткен табыстарды атап өтіп, компанияның жұмыстарына табыс тіледі.
«Облыста аграрлық сектордың орны ерекше. «John Deere» техникасының облыс ауыл шаруашылығында қолданылуы басым. Бүгінгі сервистік орталық ТМД елдеріндегі ішіндегі ең ірі болып отыр. Облыс еліміздегі бар шығарылатын астықтың төрттен бір бөлігін шығарып отыр. Жаңа орталық ауыл шаруашылығы дамыған өңірде саланы одан әрі кеңейтуге мүмкіндік беретініне сенімдімін. Жаңа бастамаларыңызбен бірлесе жұмыс істеуге дайынбыз. «Eurasia Group Қазақстан» акционерлік қоғамының сервистік орталығына зор табыс тілеймін», - деді Ақмола облысының әкімі Ермек Маржықпаев.Ауыл шаруашылығы вице министрі Айдарбек Сапаров та сөйлеген сөзінде ауыл шаруашылығының экономиканың негізгі драйвері екенін атап өтіп, бұл орайда, ауыл шаруашылығы техникаларын жөндеу және қызмет көрсету әрі сатып алудың маңыздылығын атап көрсетті. Шара барысында жаңа сервистік орталықта экскурсия ұйымдастырылды. Компания болашақта елдің 10 ірі қалалары мен аудан орталықтарында сервистік орталықтар ашуды жоспарлап отыр.
Абзал АЛПЫСБАЙҰЛЫ,
Ақмола облысы