Bek Air компаниясының басшысы Нұрлан Жұмасұлтанов жолаушыларға сатып алынған билеттердің ақшасын қашан қайтаратынын айтты, – деп хабарлайды zakon.kz.
– Оператордың сертификаты қалпына келтірілгенде, билет сату жүйесі іске қосылады, сол кезде біз кім билет сатып алды, кім оны ауыстырған, кім қайта өткізген – осындай тағы басқа мәліметтердің барлығын көре аламыз. Ал қазір түк көріп отырғанымыз жоқ. Апаттан кейінгі алғашқы күндердегідей алаяқтыққа жол бермес үшін де қазір біз ешнәрсеге қарамай ақшаны қайтара алмаймыз, – деді Жұмасұлтанов.
Авиакомпанияның Instagram-дағы парақшасында «техникалық қиындықтарға байланысты ақшаны қайтару мүмкін болмай жатқандығы» айтылды. «Бірақ ақша міндетті түрде қайтарылады» деп хабарлады олар.
Ақшаны толығымен қайтарып алу үшін оны билетті сатып алған жерге хабарласу керек. Ал егер билеттер әуекомпанияның веб-сайты арқылы сатып алынған болса, онда ақшаны қайтару жөнінде callcenter@bekair.aero электрондық поштасына сұраныс жіберу қажет.
