Солтүстік Қазақстан облысындағы мектептердің құрылысы, «Жас маман», «Серпін» бағдарламаларын жүзеге асыру барысы, жастардың Ресейге ағылуын тоқтату, жаңа мектептерге педагог мамандар даярлау мәселелері «Nur Otan» партиясы жанындағы білім мен ғылымды дамыту жөніндегі республикалық қоғамдық кеңестің Петропавл қаласында өткен көшпелі отырысында қаралды.
Солтүстік Қазақстан облысына жұмыс сапарымен келген Парламент Мәжілісінің депутаты, «Nur Otan» партиясы жанындағы білім мен ғылымды дамыту жөніндегі республикалық қоғамдық кеңестің төрайымы Жұлдыз Сүлейменова партияның сайлауалды бағдарламасында көрсетілген міндеттердің орындалуын бақылаудың маңызына тоқталды. Солтүстік Қазақстан облыстық Білім басқармасының басшысы Гүлмира Кәрімованың баяндамасынан белгілі болғандай, өңірде жылдан-жылға оқушылар саны артып келеді. Мәселен, соңғы үш жылда шәкірттер саны 5 мың адамға, яғни 70 283-тен 75 316 балаға дейін көбейген. Бұл мектептерде орын тапшылығын туғызған. Қазір үш ауысымда білім беретін мектептерді жою міндеті өткір тұр. Олардың саны – үшеу: Аққайың ауданындағы №3 Смирнов орта мектебі, Ғабит Мүсірепов атындағы ауданның орталығы Новоишимка ауылындағы №1 орта мектеп және Петропавл қаласындағы №23 мектеп. Сонымен қатар Тайынша және Вишневка орта мектептері апатты жағдайда. Сондықтан жаңа білім ошақтарын салу қажеттігі туындап отыр. «2025 жылға дейін Солтүстік Қазақстан облысында 16 мектеп құрылысы жоспарланған. Қанатқақты жоба аясында Петропавл қаласында ерекше қажеттіліктері бар балаларға арналған 400 орындық мектеп және мемлекеттік-жекешелік әріптестік есебінен 1,2 мың орындық екі мектеп салынбақшы. Сонымен қатар ауылдарда 13 мектеп бой көтермек. Жол картасы аясында алдағы бес жыл ішінде Солтүстік Қазақстан облысында 416 мектеп қайта жаңғыртылмақ. Ғимараттарды ағымдағы және күрделі жөндеу оларды пайдалану мерзімін ұзартып, апатты жағдайға ұшырауының алдын алады, оқушыларға қолайлы жағдай тудырады», – деді Білім басқармасының басшысы. «Жас маман» жобасын Солтүстік Қазақстан облысында 9 колледж жүзеге асырып отыр. Нәтижесінде, колледждердің материалдық-техникалық базасы 36 пайызға жақсартылды, еңбек нарығында сұранысқа ие жұмысшы мамандықтары бойынша кадр даярлау деңгейі арттырылды. «Серпін» бағдарламасын жүзеге асыру барысындағы кемшіліктер кеңес төрайымының назарынан тыс қалған жоқ. «Серпіндіктердің» оқуын тастап кетуіне ең алдымен баспана жоғы себеп болып отырған көрінеді. Ал оқуын жаңа бітірген еңбек өтілі жоқ жас маманның еңбекақысы орташа есеппен 80-100 мың теңге шамасында. Бұл ақша бар шығынын жабуға жеткіліксіз болғандықтан, түлектер Алматы, Нұр-Сұлтан, Шымкент қалаларына ағылуда. Осындай олқылықтардың алдын алу үшін Гүлмира Кәрімова «Серпін» жобасының түлектеріне жалдамалы пәтер беру немесе бастапқы жарнасыз ипотека беру мүмкіндігін қарастыру туралы ұсыныс жасады. Сондай-ақ оларды ыстық тамақпен, тегін жатақханамен, қажетті құрал-жабдықпен қамтамасыз ету керегі туралы сөз болды. Ең бастысы, өңірде сұранысқа ие мамандықтарға грант бөлу қажеттігіне де назар аударды. Гүлмира Кәрімова мектеп түлектерінің басқа жаққа кетуінің алдын алу мақсатында жүргізіліп жатқан жұмыстарға да тоқталды. Салдарынан түлектердің кетуі 4 жылдың ішінде 2,5 есе азайған. М.Қозыбаев атындағы университеттің ректоры Ерлан Шуланов жаңа оқу-зертханалық корпусының ашылуы да жастардың шетелдерге жол тартуын азайтады деген ойын білдірді. Көшпелі отырыс барысында М.Қозыбаев атындағы университеттің Аризона (АҚШ) университетімен ынтымақтастығы, қос диплом бағдарламасын енгізу және Назарбаев университеті тәжірибесі бойынша өңірлік университет ашу мәселелері қозғалды. Кеңес төрайымы Жұлдыз Досбергенқызы студенттер Аризона университетіне қандай критерийлер арқылы қабылданатынын және ол жақтың профессорлары СҚУ-ға қандай критерийлер арқылы келетінін, әлемдік білім сапасы қалай сақталып қалатынын біліп, нақты тетіктерін жасауды ұсынды. Ал жергілікті университетке «Кәсіби бағдар» бағдарламасын қабылдауды, алдағы уақытта еліміз бойынша салынатын 800 мектепке маман даярлауды, инклюзиялық білім беру аясында педагог кадрларды даярлаудың кешенді бағдарламасын әзірлеуді тапсырды. Жалпы, PISA нәтижелері бойынша Солтүстік Қазақстан облысы білім сапасы жөнінен елімізде үздік бестікте екеніне тоқталған Жұлдыз Досбергенқызы өңір тәжірибесін насихаттап, таратудың маңызын атап өтті.Роза ШӘКЕН, Солтүстік Қазақстан облысы