Токио Олимпиадасында қоржынға түскен сегіз медальдің екеуін жетісулық спортшылар – ауыр атлеттер Зульфия Чиншанло мен Игорь Сон жеңіп алды. Күні кеше Алматы облысы әкімдігінде қос жеңімпазға және олардың жаттықтырушыларына құрмет көрсетілді. Екі жүлдегерді қабылдаған облыс әкімі Амандық Баталов оларға су жаңа пәтерлердің кілтін тарту етті.
«Сіздердің ел спортына сіңірген еңбектеріңіз бен Олимпиада төріндегі жеңістеріңізді Мемлекет басшысының өзі жоғары бағалады. Екеуіңіз де мемлекеттік наградалармен марапатталдыңыздар. Зульфияның кеудесіне ІІ дәрежелі «Достық» ордені тағылса, Игорьдың ерлігі «Құрмет» орденімен бағаланды. Сіздер – еліміздің мақтанышысыздар! Олимпиада ойындарында қола медальге ие болу – екінің біріне бұйыра бермейтін бақыт. Бұл жетістік сіздердің және жаттықтырушыларыңыздың жылдап төккен тері, жұмсаған күш-жігерлеріңіздің арқасы. Мемлекет тарапынан спортшыларға жан-жақты қолдау тұрақты көрсетіледі. Облыстық деңгейде де көмек жасалып жатыр. Алдағы кезде қазіргі мүмкіндігімізге сай қажетті қолдаулар жалғаса береді. Бүгін сіздерді жетісулықтар атынан жарқын жеңістеріңізбен құттықтай отырып, спортта жаңа белестерді бағындыратындықтарыңызға сенім білдіремін», – деген облыс басшысы қос жеңімпазға өзінің Құрмет грамотасы мен пәтерлердің кілтін тапсырды. Зульфия Чиншанло үш бөлмелі пәтерге ие болса, Игорь Сонға екі бөлмелі баспана бұйырды. Спортшылардың бапкерлері де құр қалған жоқ. Олардың әрқайсысына 2 миллион теңгенің ақшалай сертфикаттары берілді. 2019 жылғы әлем чемпионатының күміс, биылғы Токио Олимпиадасының қола жүлдегері Игорь Сон өзінің толқынысын төмендегіше жеткізді: «Бізге көрсетіп отырған қолдауларыңызға үлкен рақмет! Бірінші кезекте азды-көпті еңбегімізді елеусіз қалдырмаған ел Президентіне шын жүректен ризашылығымызды білдіргенді жөн көріп отырмын. Өз тарапымнан айтарым, маған артылып отырған үмітті ақтауға бар мүмкіндігімді саламын. Алда Азия ойындары күтіп тұр. Ендігі мақсат, соған дұрыстап дайындалып, ең жоғары нәтижеге қол жеткізу», – деді Токио Олимпиадасының қола жүлдегері. Игорь Сонның бапкері, Қазақстан Республикасының еңбек сіңірген спорт шебері, халықаралық дәрежедегі спорт шебері Владимир Седов та қалыс қалмай, ел даңқын асырғандарды алқалап отырғандарға алғысын айтты. Кезінде өзі де ауыр атлетикада атой салған Седовтың спортинтернатта жаттықтырушы болып жүргеніне 13 жыл толыпты. Сол жылдары екі бірдей Олимпиада жүлдегерін баулып шығарған. Оның бірі Карина Горичева болса, екіншісі – Игорь Сон. Владимир шәкірттерінің жетістіктерге жетуіне олардың жаттығуына қажетті жағдайлардың барлығы жасалғаны да оң ықпал еткенін айрықша атап өтіп, алдағы кезде жақсы нәтижелер болатынына уәде етті. Жүздесу кезінде спортшылар өздерінің болашаққа бағытталған жоспарларын айтып, арман-мақсаттары мен спорттық дайындықтың ерекшеліктері жөнінде әңгімеледі. Өңір басшысы Алматы облысының ел спортына талай даңқты есімдерді тарту еткенін, қазіргі жетістіктері де жоғары екенін айта келе, бүгінгі кезде облыста спортты дамытуға айрықша назар аударылып отырғанына тоқталды. Расында солай, осыдан біраз бұрын Талдықорғанда Орталық Азияда теңдесі жоқ олимпиадалық жүзу бассейні пайдалануға берілді. Қазірдің өзінде осында жүзудің қыр-сырын меңгеруге 850-ге жуық бала жазылып, іріктеу сынынан өтіп жатыр. Олардың арасында жеңістерімен қуантатын болашақ чемпиондар барлығы анық. Елбасының ел аумағында 100 денешынықтыру-сауықтыру кешенінің құрылысын жүргізу жайындағы тапсырмасын орындау барысында аймақта қазірдің өзінде 13 осындай денешынықтыру-сауықтыру кешені жұмысқа кірісіп, тағы бесеуі салынып жатыр. Олардың шалғайдағы Балқаш ауданында орналасқан біреуі жақында пайдалануға беріледі. Облыста спорттық нысандардың құрылымына, қолайлылығына, қолжетімділігіне, материалдық-техникалық базасының дұрыстығына баса назар аударылады. Соның арқасында бұқаралық спортты барынша өрістетіп, жаңа таланттарды табуға жол ашылып келеді.Болат АБАҒАН, Алматы облысы