Бурабай ауданының орталығы Щучинск қаласында орталық мәдениет үйінің айналасында үлкен дау туындады. Тарихы тереңге кеткен ғимарат осыдан екі-үш күн бұрын тас-талқан етіп бұзылып, шаңырағы ортасына түскен. Өткен ғасырдың ерекше сәулетімен, халықтың жүрегінде биік колонналарымен есте қалған ғимараттың бұзылғанына жергілікті халық қатты наразылығын білдірді. Әлеуметтік желілер тұрғындардың билікке қарсы айтқан жазбаларына толды.
Щучинск қаласындағы 206 орынға шақталған аудандық мәдениет үйі 1959 жылы салынған. 60 жылдан астам уақыт қызмет еткен мәдениет үйі талай жастың жастық шағының куәсі. Ерекше архитектуралық колонналары бар мәдениет ошағы қаланың сәулетті орындарының бірі болған. Жергілікті халық оны бұзылмай сақталса, әлі де талай жыл бойы мызғымай тұратынына сенімді болыпты. «Өткен жылдары ғимаратқа бюджеттен қаражат бөлініп, жөндеу жұмыстары жүргізілді. Арада бір жыл өтпей тас-талқан етіп бұзып тастады. Бұл үшін біреу жаза арқалады ма? Бұл бюджеттің ақшасы ғой! Бұзатыны бар не үшін жөндеу жұмысын жүргізді? Уақытында жақсы жөндеу жұмыстарын жүргізсе мұндай болмас еді ғой. Текке кеткен ақша...», – дейді Щучинск қаласының тұрғыны Ольга Сарайкова. Тұрғындардың көпшілігі «ескі ғимараттың орнына жаңасы салынады» деген биліктің айтқан уәдесіне сенгісі келмейді. Әрі оның сапалы салынатынына күмәнмен қарайтындарын жасырмады. «Бұл ғимарат біздің жастық шағымыздың үнсіз куәсі... 1959 жылы тұрғызылған. Не үшін қуануымыз керек? Қорап сияқты пластиктен салынған жаңа ғимаратта қандай сапа бар? Мәдениет үйіміздің бұзылуы жауапкершіліктің жоғы шаруашылыққа жөндеп ие болмауынан болды. Меніңше, жаңа спорт кешенін салады да қояды. Ешқандай жаңа мәдениет үйі болмайды. Ал барлық қалаларда мәдениет үйлері бар. Енді жаңасын жуық арада сала қоятынына қатты күмәнданамын. Әрине, жаңадан бір ғимарат салынатыны анық. Бірақ қашан? Егер 30 жыл ішінде қаладағы 2 мәдениет үйін сақтап қала алмаса жаңадан салынғанынан не шығады? Мүмкін біздің ұрпағымыз жаңа мәдениет үйін көретін шығар. Өте өкінішті», – дейді Светлана Мелешенко есімді Щучинск тұрғыны. Біз ғимараттың не үшін бұзылғанын анықтау үшін аудандық мәдениет үйінің басшысымен тілдестік. Бөлім басшысы тұрғындарының уәжімен келіспейтінін білдірді. Оның айтуынша, ғимараттың өткен жылдары төбесі бұзылып, одан кейін зертханалық жұмыстар жүргізген сарапшылар мәдениет үйін бұзу туралы шешім шығарған. «Өткен жылдың 21 мамырында мәдениет үйінің екінші қабатындағы қабатаралық төбесі құлауы себепті ғимаратта барлық жұмыс тоқтатылған. Техникалық тексеріс жүргізу үшін үш бірдей сарапшылық ұйым тартылды. «Техстрой Лия» ЖШС сарапшылық ұйымының қорытындысы бойынша, мәдениет үйінде адамдардың болуы өміріне қауіп төндіреді. Бұдан кейін тексеріс жүргізген «Гарант Building», «Астана Құрылыс Сервис» компаниялары да ғимараттың одан әрі қолдануға жарамайтынын және күрделі жөндеудің экономикалық жағынан тиімсіздігін мәлімдеді. Осы құжаттар негізінде құрылған аудандық ведомствоаралық комиссия мәдениет үйі ғимаратын есептен шығару туралы оң шешім қабылдады. Бәрі заңға сәйкес жүріп жатыр», – дейді Бурабай аудандық мәдениет және тілдерді дамыту бөлімінің басшысы Дәмеш Қарсыбаева. Мәдениет бөлімі басшысының айтуынша, өткен жылдарда жүргізілген жөндеу жұмыстары тек сылап-сырлау, косметикалық жөндеу түрінде болған. Енді бұзылған ғимараттың орнына жаңадан мәдениет үйі салынбақ. «Мәдениет үйі ғимаратын бұзуға қаржы бөлу үшін жобалық-сметалық құжаттама жасалған. Оған 56 миллион теңгеге бюджеттік өтінім жасалды. Қазір жаңа мәдениет үйінің құрылысы үшін жобалық құжаттамасын жасауға қаржы бөлу үшін бюджеттік өтінім әзірленіп жатыр. Жаңа ғимаратта 400 орындық көрермен залы бар. Ескі ғимараттың алдындағы архитектуралық фасадын сақтап қалмақпыз. Жаңа мәдениет үйі заманауи құрылыс нормалары мен талаптарына сәйкес келуі тиіс. Ғимаратта фойе залы, хореографиялық зал мен киім шешетін орын, конференция залы, кіші ассамблея мен «Рухани жаңғыру» залдары, дыбыс жазу студиясы, ұжымдардың репетициялық бөлмелері, гримерлік, әкімшілік, шаруашылық және техникалық бөлмелер мен лифті болады. Сондай-ақ толық көлемде бейнебақылау камералары, техникалық және жиһаз жабдықтарымен толықтай қамтылмақ. Ғимараттың эскизін дайындау кезінде халықтың пікірі ескерілетін болады», – дейді Дәмеш Қарсыбаева. Ведомствоның мәліметінше, биыл жобалық құжаттары жасалып, құрылыс жұмыстары келер жылы басталуы тиіс.P.S. Сонымен, әзірге бурабайлықтардың өткен күндерін еске салатын мәдениет үйінің орнына жаңа ғимараттың қашан нақты салынатыны әзірге белгісіз. Ал 50 мыңға жуық тұрғыны бар қаланың мәдениет үйсіз қалуы өте өкінішті екені айтпаса да түсінікті...
Абзал АЛПЫСБАЙҰЛЫ, Ақмола облысы