Конференция лигасының кезекті кезеңі аясында алматылық «Қайрат» футбол клубы Люксембургтің «Фоласын» ұтты. Сырт алаңда өткен матч 1:4 есебімен аяқталды. Алғашқы голды алаң иелері соққан болатын. Артынша «Қайрат» сапындағы Артур Шушеначев пен Рикарду Алвеш мергендігімен көзге түсіп, өз командасын алға шығарды. Ал Вангер Лав дубльдің авторы атанды. Осылай «Қайрат» клубы конференция лигасының топтық кезеңіне бір табан жақындады.
«Қайрат» биылғы еурокубокта алғаш рет сырт алаңда жеңіске жетіп отыр. Бұған қоса, алғаш рет сырт алаңда 4 гол соқты. Қазақстандық клуб бірінші рет Люксембург командасынан басым түскенін де атаған жөн. Енді қос клуб 26 тамызда Алматыда жолығады. Жеңіске жеткен тарап конференция лигасының топтық кезеңіне шығады. Ал қарағандылық «Шахтердің» футбол клубының жолы болмады. Олар «Астана Аренада» Тель-Авив қаласының «Маккаби» клубын қабылдап, 1:2 есебімен есе жіберді. Екі команда 26 тамызда қайта ойнайды.М.ХАҚНАЗАР