Мәжіліс Спикері Нұрлан Нығматулиннің төрағалығымен палатаның VII шақырылымның екінші сессиясындағы алғашқы жалпы отырысы өтті.
Күн тәртібіндегі мәселеге кіріспес бұрын Мәжіліс Төрағасы депутаттық корпустың назарын Мемлекет басшысы Қасым-Жомарт Тоқаевтың Қазақстан халқына Жолдауында айтылған басымдықтарына тоқталды. Cонымен қатар Мәжіліс Төрағасы бюджет-қаржы жүйесін жақсарту, елді саяси жаңғыртуды жалғастыру сияқты міндеттерге де назар аударып, осы тапсырмалардың барлығы Парламенттің алдағы кезеңдегі заң шығару жұмысы үшін де айқын бағыт бергенін атап өтіп, Мәжіліс депутаттарына, Қазақстан Президентінің Жолдауында белгіленген елді жүйелі жаңғырту үшін мықты заңнамалық базаны сапалы және жедел құру қажеттігіне назар аударды. Мәжіліс Спикері депутаттар қарауындағы заң жобалары туралы айта келіп, қазір палатада қаралып жатқан өнеркәсіптік саясат туралы заң жобасына, ел Президенті әзірлеп, қабылдауды тапсырған агломерацияны дамыту, кәсіби біліктілік туралы заң жобаларына да тоқталды. Нұрлан Нығматулин алдымызда Әлеуметтік кодекс жобасымен жұмыс тұрғанына, осы және басқа да заң жобалары бойынша барлық жұмысты, әдеттегідей ашық және транспарентті түрде жүргізетінін, оған азаматтық қоғам, бұқаралық ақпарат құралдары өкілдерінің белсенді түрде қатысуымен өткізілетін атап өтті. Бүгінгі жалпы отырыста Палата комитеттері қорытынды әзірлеу үшін бірқатар жаңа заң жобаларын жұмысқа алды. Олар: Ұлттық қордан 2022-2024 жылдарға арналған кепілдендірілген трансферт туралы, 2022-2024 жылдарға арналған республикалық бюджет туралы, сондай-ақ Тәуелсіздіктің 30 жылдығына байланысты рақымшылық жасау туралы заң жобасы. Сонымен қатар Қылмыстық кодекске өлім жазасы мәселелері бойынша түзетулер енгізу туралы, құқық қорғау қызметін өткеру тәртібін жетілдіру, сыбайлас жемқорлыққа қарсы іс-қимыл мәселелеріне түзетулер енгізу бойынша өзгерістер мен толықтырулар енгізу туралы заң жобалары бойынша қорытынды әзірленетін болады. Сондай-ақ Қазақстан Республикасының биологиялық қауіпсіздігі туралы және оған ілеспе заң жобалары, бәсекелестікті дамыту мәселелері бойынша және көлік мәселелері туралы жаңа заң жобаларын Палата комитеттері жұмысқа алды. Осы жұмысқа алынған жаңа заң жобаларының қатарында бірқатар ратификациялық құжаттар бар. Атап айтқанда, дербес деректер алмасу саласындағы әкімшілік мәселелер бойынша өзара құқықтық көмек туралы, Еуразиялық экономикалық комиссияның бәсекелестіктің бірыңғай қағидаларының сақталуын бақылау жөніндегі өкілеттіктерді жүзеге асыруы кезінде құпия ақпаратты қорғау тәртібі және оны жария еткені үшін жауаптылық туралы келісімге өзгерістер енгізу туралы хаттама және Қазақстан мен Қырғыз Республикасы және Тәжікстан Үкіметтері арасындағы өтеусіз әскери-техникалық көмек көрсету туралы келісімдерді және Тәуелсіз Мемлекеттер Достастығына қатысушы мемлекеттер қарулы күштерінің бірлескен гуманитарлық минасыздандыру инженерлік бөлімшесі туралы келісімді ратификациялау, Каспий теңізінің теңіз ортасын қорғау жөніндегі негіздемелік конвенцияға Каспий теңізін жерүсті көздерінен және құрлықта жүзеге асырылатын қызмет нәтижесінде ластанудан қорғау жөніндегі және Каспий теңізінің теңіз ортасын қорғау жөніндегі негіздемелік конвенцияға биологиялық әралуандылықты сақтау туралы хаттамаларды ратификациялау туралы заң жобалары бар. Отырыс соңында Мәжіліс депутаттары мемлекеттік органдар басшыларына депутаттық сауал жолдады. Сондай-ақ Мәжілістің жалпы отырысында Парламент Мәжілісінің депутаты А.Сембиновтің өкілеттігін мерзімінен бұрын тоқтату туралы қаулы қабылдады. Сондай-ақ Парламент Мәжілісінің депутаты Н.Ожаев ант беріп, Аграрлық мәселелер комитетінің құрамына сайланды.Ж.НҰРЛАН