Ауыл шаруашылығы министрлігі егін ору науқанының қалай жүріп жатқанын баяндады. Ведомствоның хабарлауынша, 2021 жылғы 9 қыркүйектегі жағдай бойынша республика көлемінде 11,8 миллион гектардан дәнді және дәнді-бұршақты дақылдар жиналды. Бұл биыл орақ салынатын жалпы егістік алаңының 74,3%-ы. Яғни, орақ науқаны аяқталуға таяу.
Биылғы орташа өнімділік гектарына 8,7 центнерден ғана айналып отыр. Осылайша, әзірге 10,3 миллион тонна астық бастырылды.
Осы жылдың шілде-қазан айларында егіншілерге 396,5 мың тонна бағасы арзандатылған дизель отынын тарату жоспарланған-тын. Оның 221,1 мың тоннасы немесе 56% ғана тиеліп, жөнелтілді.
Энергетика министрлігі мұнай өңдейтін зауыттармен бірлесіп, 1 литр дизель үшін 156 теңге бағасын белгіледі. Бірақ операторлардың жеткізу құны қосылғанда өңірлерде орташа баға әр литр үшін 177 теңге, бұл нарықтық бағадан 11%-ға ғана арзан (ЖҚС-терде – 198 теңге).
«Жалпы, егін жинау науқаны штаттық режимде өтіп жатыр. Ауа райы қолайлы болған жағдайда егін жинау науқанын оңтайлы мерзімде аяқтап, астық жинау бойынша болжамдар толық орындалады деп жоспарланып отыр», – деді АШМ.
