«Nur Otan» партиясының Төрағасы – Елбасы Нұрсұлтан Назарбаев 2019 жылы «Жастар жылы» аясында «Жас маман» жобасын әзірлеуді тапсырған болатын. Аталған жобаның басты мақсаты – елімізде ең көп талап етілетін 100 кәсіп бойынша 180 колледж бен 20 университетті жаңарту мен білікті мамандарды даярлаудың халықаралық тәжірибесін енгізу.
Аталған жоба негізінде атқарылған жұмыстармен танысу үшін Шымкентке Парламент Мәжілісінің депутаты, «Nur Otan» партиясы фракциясының мүшесі Жұлдыз Сүлейменова арнайы іссапармен келіп, бірқатар оқу орнын аралады. Сонымен қатар ол «Nur Otan» партиясының «Өзгерістер жолы: әр азаматқа лайықты өмір!» атты сайлауалды бағдарламасын Шымкент қаласы бойынша іске асыру мақсатында әзірленген Жол картасының орындалуы бойынша бірнеше мектептің оқу процесімен танысты. Мәжіліс депутаты алдымен қаладағы №5 «Жеңіл өнеркәсіп және сервис колледжінің» ұжымымен кездесіп, оқу орнының материалдық-техникалық жағдайын көрді. Аталмыш білім мекемесінде бүгінде мыңнан аса шәкірт тәрбиеленуде. Олар тігін өндірісі және киімдерді үлгілеу, тігінші, арнайы тігінші, модельер-пішуші, техник-технолог, тоқыма өндірісі, тоқыма машинасының операторы мамандықтары бойынша білім алуда. Одан соң халық қалаулысы Шымкенттегі «Жол-көлік колледжіне» барды. Аталған білім мекемесінің «Жас маман» жобасы бойынша материалдық-техникалық базасын халықаралық стандарттар талабына сай соңғы заманауи үлгідегі құрал-жабдықтармен қамтамасыз ету үшін мемлекет есебінен қажетті қаражат бөлінген. Соған сәйкес, оқу орнындағы «Автомобиль көлігіне техникалық қызмет көрсету, жөндеу және пайдалану», «Теміржол көлігіндегі автоматика, телемеханика және қозғалысты басқару» мамандықтары бойынша еңбек нарығында сұранысқа ие білікті мамандар даярлау, олардың кәсіби біліктілігін дамыту мақсатында 264 млн теңгеге қажетті құрал-жабдық сатып алынған. «Жас маман» жобасы бойынша колледждің автомеханика бөлімі мен теміржол бөлімдерінің зертханалары мен кабинеттері талапқа сай заманауи құралдармен жабдықталған. Сонымен қатар гараж кешенінде зертханалық кабинет ашылып, жаңа құрал-жабдық орнатылыпты. «Жас маман» жобасы аясында «Автомобиль көлігіне техникалық қызмет көрсету, жөндеу және пайдалану» мамандығы бойынша – 33, «Автомобиль көлігіне техникалық қызмет көрсету, жөндеу және пайдалану» мамандығы бойынша – 9, «Теміржол көлігіндегі автоматика, телемеханика және қозғалысты басқару» мамандығы бойынша 22 атаулы құрал-жабдық алынған. Жалпы «Жас маман» жобасы аясында колледждердің материалдық-техникалық базасын халықаралық стандарттар талабына сай, соңғы заманауи үлгідегі құрал-жабдықтармен қамтамасыз ету – білім сапасын көтеру жолында оң серпін берері сөзсіз. Жұлдыз Досбергенқызы бет алған кезекті нысан «Сайрам көмекші интернат-мектеп-колледжі» болды. «Nur Otan» партиясының «Кедергісіз келешек» жобасы аясында «Сайрам көмекші мектеп-интернаты» мекемесінің ескі ғимараты толық сүріліп, оның орнына заманауи талапқа сай жаңа ғимарат бой көтерген. Алғашында балалар үйі болып құрылып, кейіннен көмекші мектеп-интернаты қызметіне көшкен нысан енді «Сайрам көмекші мектеп-интернат-колледж» арнайы кешені» коммуналдық мемлекеттік мекемесі болып өзгертілді.
Бүгінде Шымкент қаласы Білім басқармасына қарайтын колледждегі құрылыс жұмыстары 95 пайызға аяқталған. Өз кезегінде колледжде үш қабатты оқу ғимаратынан бөлек, 100 орынға лайықталған асхана, акт залы, спортзал, ағаш өңдеу және тігін шеберханасы бар.
Арнайы оқытуды қажет ететін балалар аталған мектеп-интернат-колледжін тәмамдаған соң, арнайы мамандықтар бойынша диплом алып шығады. Бұл білім мекемесі Қазақстанда тұңғыш рет көмекші мектеп-колледж мәртебесін алып отыр.
Жалпы, аталған мекемедегі ауқымды құрылыс жұмысы «Nur Otan» партиясының «Өзгерістер жолы: әр азаматқа лайықты өмір!» атты 2021-2025 жылдарға арналған Шымкент қаласы бойынша сайлауалды бағдарламасын іске асыру бойынша әзірленген Жол картасындағы кешенді іс-шаралар қатарында.
Мектеп-интернат-колледждің жұмысымен толық танысқан Ж.Досбергенқызы мектеп басшылығы мен қызметкерлер тарапынан жұмыс барысында қандай кедергілер барын сұрады. Өз кезегінде мектеп ұжымы депутат назарына бірқатар мәселені көлденең тартты. Атап айтқанда, «Бала құқықтарын қорғау туралы» заңның 30-бабында жазылған «Арнаулы білім беру ұйымдарында 11 жастан 18 жасқа дейінгі девиантты мінез-құлықты балалар орналастырылады» дегенді «Арнайы мектеп-интернат ұйымдарында» деген сөйлем қосуды қарастыруды, азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі туралы Қазақстан Үкіметінің 2015 жылғы 31 желтоқсандағы №1193 қаулысына өзгеріс енгізуін, ерекше оқытуды қажет ететін мектеп-интернат ұстаздары мен тәрбиешілеріне зияндылық үшін еңбекақысына үстеме жалақы 25% төленуін атап өтті. Өз кезегінде кеңес төрағасы Ж.Досбергенқызы айтылған ұсыныстарды жан-жақты зерделеп, оның оң шешімін табуына ықпал ететінін жеткізді.
Мәжіліс депутаты, «Nur Otan» партиясының жанындағы білім және ғылымды дамыту жөніндегі республикалық кеңестің төрағасы, фракция мүшесі Жұлдыз Досбергенқызының жұмыс сапары қаладағы жекеменшік негізде ашылған мектептердің оқу процесімен танысумен жалғасты.
«Nur Otan» партиясының «Өзгерістер жолы: әр азаматқа лайықты өмір!» атты сайлауалды бағдарламасын Шымкент қаласы бойынша іске асыру мақсатында әзірленген Жол картасында білім саласы бойынша 13 тапсырма бар. Бүгінде оның 5-уі толық орындалған. Білім саласы бойынша орындалуы тиіс іс-шаралардың қатарында үш ауысымды мектеп мәселесін шешу көзделген. Осы мақсатта қалада жекеменшік мектептер ашылған. Соның бірі – «Әл-Фараби» академиялык мектебі. Аталған нысан әу баста тойханаға арналып салынған ғимарат (Оңтүстік қабылдау үйі) болатын. Кейіннен жан басына қаржыландыру есебінен қайта құрылымдау арқылы мектеп болып өзгертілген. Соңғы кездері дәл осы мектептегі оқу процесі бойынша әлеуметтік желіде ата-аналар тарапынан шағым түскен. Осыған орай Мәжіліс депутаты аталған мектепке арнайы барып, оқу процесі бойынша бірнеше ұсыныс айтты. Депутат айтылған ұсыныстың барлығы партия бақылауында болатынын атап өтті.
Айта кетейік, биыл Шымкент қаласында 5 үш ауысымды мектептің мәселесі оң шешіліп, олардың саны 14-тен 9-ға азайған.
Назгүл НАЗАРБЕК, Шымкент қаласы