Нұр-Сұлтанда XVII Еуразиялық медиафорум ашылды. Медиақұрылтайдың күн тәртібіне заманауи халықаралық саясат пен ақпарат құралдары қызметінің өзекті мәселелері шығарылды. Алқалы жиын Қазақстан Тәуелсіздігінің 30 жылдығына арналған пленарлық сессиядан бастау алды.
Онлайн және оффлайн форматта өтетін форумды Еуразиялық медиафорумның ұйымдастыру комитетінің төрайымы, Нұрсұлтан Назарбаев Қорының директоры Дариға Назарбаева ашты. Оның байламынша, биыл Қазақстан үшін ерекше мәнге ие: елдің азаттық алғанына 30 жыл. Бұл «бейбітшілік, жасампаздық, заманауи мемлекеттілік пен азаматтық қоғамның институттары құрылған жылдарға» айналды. Д.Назарбаева жаңа Қазақстанды қалыптастырудағы Елбасының рөлін ерекше атады: – Соңғы 30 жыл тұрақты саяси, әлеуметтік, экономикалық жүйе, саяси және азаматтық мәдениет қалыптаспаған дамушы әлемде даму траекториясы көшбасшысының ерік-жігеріне өте қатты тәуелді екенін дәлелдеді. Бастапқы жағдайлар, табиғи ресурстар үлкен рөл атқарады. Ең бастысы, көшбасшының тұлғасы, оның болашаққа көзқарасы, елдің әлемдегі орны маңызды. Тұңғыш Президенттің басшылығымен еліміз қысқа тарихи кезеңде тәуелсіздікке, мемлекеттік егемендікке қол жеткізді, толыққанды заманауи экономика мен қарқынды дамып келе жатқан әлеуметтік саланы құра білді, – деді ол. Форумның ұйымдастыру комитетінің төрайымы тәуелсіз Қазақстанның қазіргі халықаралық саясаттағы, әсіресе Орталық Азия өңіріндегі рөліне тоқталды, БАҚ-тың, интернеттің, әлеуметтік желінің рөліне тоқталған ол «жаһандық ақпараттық орта ұлттық және мәдени егемендікке елеулі қауіп төндіретініне» форум қатысушыларының назарын аударды. Жиында коронавирус пандемиясы және оның қазіргі халықаралық қатынастар жүйесіне әсері талқыға салынды. Пандемия халықаралық сенім мен диалог тетіктерінің үдерісін жеделдетті. Бұл ретте, Еуразиялық медиафорум сияқты алаңдардың рөлі зор. «Біздің айтарымыз, талқылайтын мәселеміз бар, айырмашылықты емес, сындарлы өзара іс-қимыл үшін қиылысу нүктелерін іздеу керек», – деп түйді төрайым. Жұмысын бүгін жалғастыратын XVII Еуразиялық медиафорумға Сенат Төрағасы Мәулен Әшімбаев, Мемлекеттік хатшы Қырымбек Көшербаев, әлемдік және қазақстандық жетекші БАҚ өкілдері, халықаралық сарапшылар, саясаткерлер, ғалымдар, қоғам және мәдениет қайраткерлері қатысуда. Жиында қазіргі геосаяси, әлеуметтік, идеологиялық сын-тегеуріндер, қауіпсіздікке төнетін қауіп-қатерлер, жаңа технологияларды дамыту, білім беру және басқа да толғауы тоқсан, мән-маңызы терең мәселелер талқыға түседі.Елдос СЕНБАЙ