Қарағанды облысында әлеуметтік-экономикалық дамудың барлық көрсеткіші бойынша оң динамика байқалады. Жыл соңына дейін 14 жаңа өндіріс іске қосылып, екі мыңға жуық жаңа жұмыс орны ашылады деп күтілуде. Тұрғын үй құрылысы өсуінің арқасында кезекте тұрғандар қатарынан үш мыңға жуық отбасы пәтерлермен қамтамасыз етіледі.
Облыс әкімі Жеңіс Қасымбек қоғамдық кеңестің онлайн отырысында жұмыс нәтижелері мен жүктелген міндеттердің орындалуы туралы есеп берді. – Жалпы, өңір экономикасында оң динамика қамтамасыз етілді. 8 айдың қорытындысы бойынша сауда-саттық – 8,9%-ға; пайдалануға берілетін тұрғын үй көлемі – 19,9%-ға; ауыл шаруашылығы 3,6%-ға сенімді өсім көрсетті. Өнеркәсіптегі өсім 0,3%-ды, құрылыста – 2%-ды құрады, – деп атап өтті облыс әкімі. – Инвестициялар көлемі 470 млрд теңгеге дейін немесе 2020 жылдың сәйкес кезеңіне 105,4%-ға дейін өсті, бұл ретте 89,5% жеке инвестициялар. Жыл соңына дейін 230 млрд теңгеден астам сомаға 14 жаңа өндіріс іске қосылып, екі мыңға жуық жұмыс орны ашылады. Облыста пандемия салдарынан бизнес біртіндеп қалпына келтіріліп жатыр. Бұған мемлекеттік қолдау көмектеседі. «Бизнестің Жол картасы – 2025» бойынша қаржыландыру 3,2 есеге, «Қарапайым заттар экономикасы» бойынша 2 есеге ұлғайды. Құрылыс көлемі «Нұрлы жол», «Нұрлы жер», «Ауыл – ел бесігі», «Жұмыспен қамтудың Жол картасы – 2020» мемлекеттік бағдарламаларын іске асыру есебінен өскен. Биыл «Нұрлы жер» бағдарламасы бойынша кемінде 662 мың шаршы метр тұрғын үй енгізу жоспарланған. Жол-көлік инфрақұрылымын дамыту жалғасуда. Биыл республикалық және жергілікті маңызы бар 1 500 шақырымнан астам автомобиль жолдары жөнделді. «Ауыл – ел бесігі» арнайы жобасы үлкен демеу болды, бағдарламаның арқасында 25 ауыл мен кенттегі жолдар ретке келтірілді. Әлеуметтік сала да дамып келеді. Үш ауысымды және апатты мектептердің орнына Қарағанды мен Жезқазғанда, Жаңаарқа мен Шет аудандарында төрт мектеп салынып жатыр. Бюджеттік және бюджеттен тыс қаражат есебінен, оның ішінде «Ауыл – ел бесігі» бойынша 13 спорт нысанының құрылысы жүргізілуде. Жақында Шахтинск, Ботақара, Қарсақпай және Жезді, Жаңаарқа және Нұра елді мекендерінде алты жаңа спорт кешені ашылады. Сондай-ақ жаңа спорт алаңдары, көпфункционалды хоккей корттары салынады, барлығы 77 нысан. Бұқаралық спортты дамыту үшін үш мыңға жуық адамды қамтитын қосымша 94 секция пайда болды. Мемлекеттік бағдарламалар бойынша 21 мыңнан астам жаңа жұмыс орны құрылды, олардың жартысы тұрақты. Жұмыспен қамтуға жәрдемдесу шараларымен барлығы 75 мыңнан астам адамды қамту жоспарланып отыр. – Өте мазмұнды есеп. Өңірлік дамудың барлық бағыты бойынша жақсы көрсеткіштер бар. Мысалы, инвестициялардың өсуі қуантады – пандемия жағдайында шетелдік капиталды тарту оңай емес. Шағын және орта бизнесті қолдау нәтижелерін, қазақстандық қамтуды ұлғайту жөніндегі жұмыстың тиімділігін атап өткен жөн. Ірі жүйе құраушы компаниялардың тапсырыстарымен облыстың 60 кәсіпорны қамтамасыз етілді, – деп түсіндірді қоғамдық кеңестің төрағасы Ерқара Аймағамбетов. – Біз қалалар мен аудандардың тұрғындары қойып отырған өзекті мәселелер шешіліп жатқанын көріп отырмыз.Әділ БЕК