Түркістан облысынан бір топ тұрғын Павлодар облысына аттанды. Мақсат – «Еңбек» бағдарламасы аясында көшу үшін Павлодар өңіріндегі ауылдарды алдын ала көріп, ол жақтағы тіршілікпен танысу. Бұл игі бастаманы «Nur Otan» партиясының Түркістан облысындағы филиалдары және жергілікті жұмыспен қамту орталықтары ұйымдастырды.
Жеке кәсіпкер, қоғам белсендісі Жаңабай Ағабеков өз қаражаты есебінен автобус ұсынып, тұрғындардың барып-қайтуына демеушілік жасады. Алдымен көшуге ниетті тұрғындар Сарыағаш ауданында жиналды. Сарыағаш ауданы әкімінің орынбасары Бақытжан Полатов пен «Nur Otan» партиясы Сарыағаш аудандық филиалы төрағасының бірінші орынбасары Құдірет Қыстаубаев жолаушыларға сәт-сапар тіледі. Осындай салтанатты іс-шара Сайрам ауданында да жалғасын тапты. Сайрам аудандық мәслихатының хатшысы Шамхат Халмұрадов пен «Nur Otan» партиясы Сайрам аудандық филиалы төрағасының бірінші орынбасары Алмас Әбдіқадіров «Еңбек» бағдарламасының маңызына тоқталып, тұрғындарға қосымша мағлұмат берді. Кәсіпкер Жаңабай Ағабеков солтүстік өңірлерге көшкен тұрғындарға мемлекеттік қолдау көрсетілетінін, ең бастысы, жұмыс істеуге ниетті азаматтар жұмыспен қамтылатынын, баспаналы болуға да мүмкіндік мол екенін жеткізді. Түркістан облысынан жалпы саны 30 тұрғын жолға шықты. Нақтырақ айтсақ, Жетісай ауданынан – 2, Келес ауданынан – 3, Сайрам ауданынан – 8, Арыс қаласынан – 2, Ордабасы ауданынан – 6, Сарыағаш ауданынан – 6, Мақтаарал ауданынан – 1 және Қазығұрт ауданынан 2 азамат Павлодарға аттанды. Олардың жолақысы және жатын орны тегін. Азаматтар ауылдарды аралап, тұрғындардың жағдайымен танысады. Егер ұнаса, көшеді. 2021 жылдың басынан бері «Еңбек» бағдарламасы бойынша Түркістан облысынан 412 отбасы, 1 792 адам қоныс аударған. «Nur Otan» партиясының Түркістан облыстық филиалы төрағасының бірінші орынбасары Бейсен Тәжібаевтың айтуынша, көші-қон бойынша түсіндіру жұмыстары жалғасады. Барлық аудан, қалада «Еңбек» бағдарламасын насихаттау, түсіндіру бойынша «Ашық есік күндері» ұйымдастырылған.Әбілмансұр ЖАСАН