Алматыда қала күніне орай «KITAP FEST – 2021» кітап фестивалі өтеді. Фестивальға шамамен 500 адам қатысады.
Алмалы шаһарда 2014 жылдан бері жыл сайын KitapFest кітап фестивалі ұйымдастырылады. Айтулы іс-шара 7 жыл ішінде республикалық зияткерлік платформаға айналды. Биыл фестиваль 25 қыркүйек күні «Форум» сауда орталығында өтеді. Фестивальді ұйымдастырушылардың айтуынша, биыл пандемияға байланысты шектеулі форматта өтеді. Келушілер саны 500-ден аспайды. Кітап фестиваліне қатысқыңыз келсе, ASHYQ қосымшасында «жасыл» статус болуы міндетті . Одан бөлек, маска режимі сақталады. Фестиваль аясында дәрістер, жазушылармен кездесу, кітаптардың тұсаукесерлері мен байқаулар өтеді. Сондай-ақ «KITAP FEST – 2021» аясында спикерлердің баяндамаларын онлайн трансляциялауға мүмкіндік бар. Іс-шараның ең қызық кезеңі кітап алмасу десек, соның арқасында сөрені түрлі жанрдағы қызықты кітаптармен толықтырудың бірегей мүмкіндігі пайда болады. Жазу шатырына келсек, отандық жазушылар өз кітаптарын ұсынып, сөз сөйлейді. Кітап жәрмеңкесінде кітап дүкендері, баспалар және интернет дүкендер көрмеде өнімдерін ұсынады. Оған қоса, балаларға арналған ойын-сауық бағдарламасы да бар.Айбике ЖАНАСЫЛ