Мәулен Әшімбаев Түркия Ұлы Ұлттық жиналысының Төрағасы Мұстафа Шентоппен кездесті
©Е.Үкібаев
Сенатта Мәулен Әшімбаев Түркия Ұлы Ұлттық жиналысының Төрағасы Мұстафа Шентоппен кездесті. Сенат Төрағасы кездесу барысында Қазақстан мен Түркия арасындағы қарым-қатынас стратегиялық әріптестікке, сондай-ақ тарих, мәдениет және тілдердің ортақтығына негізделгенін атап өтті.
©Е.Үкібаев[/caption]
«Алдағы кезеңде бізге екі ел парламенттері арасындағы өзара қарым-қатынасты нығайтудың маңызы зор. Біз салалық комитеттердің ынтымақтастық топтарының кездесулерін тұрақты өткізіп, дөңгелек үстелдер ұйымдастырып, заңнамалық тәжірибемен бөлісе аламыз. Мұндай алаңдарда екіжақты қарым-қатынастарды дамыту мен халықаралық күн тәртібі бойынша ортақ ұсыныстарды талқылауға және қалыптастыруға болады», – деді Мәулен Әшімбаев.
Тараптар әңгіме барысында логистика, цифрлық технология, ғарыш, туризм, мәдениет, білім беру және сауда-экономикалық қатынастар салаларындағы әріптестікті дамытудың келешегін талқылады.
Сенат Төрағасы Мәулен Әшімбаев кездесу соңында Қазақстан мен Түркия арасындағы достық қарым-қатынастарды нығайтуға қосқан зор үлесі үшін әріптесіне алғыс айтып, бұл сапар парламентаралық ынтымақтастыққа жаңа серпін беретініне сенім білдірді.