Ақтау тұрғындары әлеуметтік желіде туристерді тарту үшін отырғызылған "гүл алқабының" сапасыз екеніне шағымданды. "Отырғызылған" пластик қызғалдақтардың бір бөлігі құлап, кей жерлерде электр сымдары қоршалмаған, – деп хабарлайды Lada.kz.
Ақтауда 15 миллионнан астам теңге бюджет қаржысына пластик қызғалдақтардан жасалған "гүл алқабы" инсталляциясы әлеуметтік желі қолданушыларының наразылығын тудырды. Жергілікті тұрғындар "гүл алқабының" қолдан жалғанғанын, сондай-ақ пайдаланылған материалдардың сапасы төмен екенін айтады.
Lada.kz тілішісі 24 қазанда пластикалық қызғалдақтарды суретке түсірген. Кейбіреулері бүлінген.
Кей жерлерде пластик қызғалдақтар құлап жатыр. Суретте жасанды көгал қисық екені байқалады.
Қондырғының электр сымдары оқшауланбаған, көгалдың үстінде жатыр.
Ақтауда Ынтымақ алаңындағы көгалдың орнына бюджеттен 15 404 000 теңгеге пластиктен "гүл алқабы" отырғызылды. Әкімдікте безендіру, жарықтандыру бойынша жұмысты "Clover media group" ЖШС жүргізді, компаниямен Ақтау қалалық тұрғын үй-коммуналдық шаруашылық бөлімі 16 қыркүйекте келісімге қол қойғаны хабарланды.
