20 мыңға жуық адам жұмыспен қамтылды
20 мыңға жуық адам жұмыспен қамтылды

Шымкентте биыл «Еңбек» мемле­кеттік бағдар­ламасының шеңберінде 21 954 адамды жұмыспен қамту шара­ларына қатыстыру жоспарланса, 9 айда 19 462 адам жұмыспен қамтыл­ған. Бұл туралы Шымкент қаласының Жұмыспен қамту және әлеуметтік қор­ғау басқар­ма­­сының басшысы Б.Нар­бекова қала әкім­дігінің Instagram парақ­­­шасында өткен тікелей эфирі ке­зін­­де атап өтті.

Басқарма басшысының айтуынша, бағдарламаның І бағыты бойынша 2 675 адам 3 айлық кәсіптік оқыту курстарына, ІІ бағытымен 2 155 адам «Бастау бизнес» жобасы аясында кәсіпкерлік курсына оқытуға жолданған. 53 адамға шағын несие, 584 адамға мемлекеттік грант берілген. Бағдарламаның халықты жұмыспен қамтуға жәрдемдесу деп аталатын  ІІІ бағыты аясында 8 168 адам бос және жаңа жұмыс орындарына, 336 адам әлеуметтік жұмыс орындарына, 2 531 жан жастар практикасына және 2 845 адам қоғамдық жұ­мысқа, «Алғашқы жұмыс орындары» жо­басы бойынша 115 адам  24 айға жол­данған.
«Қыркүйек айында «Арбат» алаңында жастарға арналған бос жұмыс орындары жәрмеңкесі өткізілді. Жәрмеңкеге қала­дағы 50-ден аса жұмыс беруші кәсіп­орындар мен мекемелер қатысып, 9 мыңға жуық бос жұмыс орындарын ұсынды. Нәтижесінде, тұрақты жұмысқа 790 азамат, «Жастар практикасы» бағдарлама­сымен 121 жас жолдама алды. Шаһарда халықты әлеуметтік қор­­ғау бағы­тында да жүйелі іс-шаралар атқарылып жатыр. 2021 жылдың  І тоқса­нында 36 969 отбасына  (179 209 адам), ІІ тоқсанда 30 962 отбасына (149 147 адамға),  ІІІ тоқсанда 19 333 отбасына (90 177 адамға) мемлекеттік атау­лы әлеуметтік көмек төлен­ді», – деп атап өтті Балмаржан Полатқызы. 
Сондай-ақ басқарма басшысы арнаулы әлеуметтік қызметтер, азаматтық құқық­тық актілерін тіркеу, көші-қон мәселесі және қандастармен жұмыс істеу, ардагерлер мен аз қамтамасыз етілген азаматтарды қолдау іс-шараларынан хабардар етіп, тұрғындар сауалына жауап берді.

Назгүл НАЗАРБЕК, Шымкент қаласы