Үкімет отырысында Ұлттық статистика бюросының басшысы Нұрболат Айдапкелов биыл халық санағы бірінші рет онлайн өткенін мәлімдеді.
«Елімізде Ұлттық халық санағы аяқталды. Тұрғындардың барлық санатын қамтыдық. Халықтың 42,5%-і сауалнаманы онлайн толтырды. Санақшылар үй аралап жүріп елдің 57,5%-інен сауалнамаға жауап алды», – деді Нұрболат Айдапкелов.
Енді Ұлттық статистика бюросы жиналған деректерді өңдеп, сараптап, желтоқсан айында алғашқы нәтижесін жарияламақ.
