Белгілі ақын Алмас Темірбайды полиция қызметкерлері ұстап әкетті. Бұл туралы ақынның өзі Facebook-тегі парақшасында хабарлады.
"Полиция алдында хабарласқан, енді үйдің жанынан ұстап алып, ДВД-ға әкетіп барады. "Бірдеңе түсіндіреміз" дейді", – деп жазды ол.
Алмас Темірбай 1979 жылы 22 қаңтарда бұрынғы Көкшетау облысы Көкшетау ауданы Ортақ ауылында дүниеге келген. Әл-Фараби атындағы Қазақ Мемлекеттік Ұлттық университетінің журналистика факультетінде және Көкшетау мемлекеттік университетінің саясаттану факультетінде білім алған. «Аллажар», «Жұмақ жұрт», «Автопортрет», «Мың бір мұң» атты өлең кітаптарының авторы. Белгілі әдебиетші-ғалым Нұртас Ахатұлының А.Темірбай шығармашылығы туралы жазған «Алаштың Алмас ақыны» атты монографиясы жеке кітап болып 2008 жылы жарық көрген.
Халықаралық «Шабыт» фестивалінің екі мәрте лауреаты және Гран-при жүлдесінің иегері. Халықаралық «Түрік поэзиясы» фестивалінің лауреаты. Қазақстан Жастар одағының «Серпер» сыйлығының лауреаты. «ҚР Тұңғыш Президенті» сыйлығының лауреаты, ҚР Үкіметінің «Дарын» мемлекеттік жастар сыйлығының лауреаты. Қазақстан Жазушылар одағының және Журналистер одағының мүшесі. Ақын өлеңіне жазылған әндер бүгінде әртүрлі Қазақстан эстрада жұлдыздарының орындауында айтылып жүр.
