Қарағанды облысында жасы зейнетке жақын қалған азаматтарды жұмысқа алған мекемелерге субсидия берілмек.
Жаңа бағдарламаның мүмкіндігін биыл 534 адам пайдалана алады. Жұмыс берушілерге осындай қызметкерлердің жалақысы 30 АЕК мөлшерінде субсидияланады.
Жұмыспен қамтуды үйлестіру және әлеуметтік бағдарламалар басқармасының басшысы Әсем Жүніспекова: «Зейнет жасына таяп қалған жұмыссыздарға жұмыс тауып берсе, жалақыны субсидиялаймыз. Жыл бойы ай сайын мемлекет тарапынан 30 АЕК, яғни 91 890 теңге төленеді», – деді.
«Күміс жас» жобасы аясында жұмыс тауып, жалақы алғысы келетін азаматтар жұмыспен қамту орталықтары немесе Еnbek электронды еңбек биржасынан бағдарламаның артықшылығы жөнінде толыққанды ақпарат ала алады.
