US News & World Report нұсқасы бойынша білім беру саласындағы үздік елдер рейтингінде Қазақстан 78 ел ішінде 71-орында тұр. Бұл тұста Ranking.kz сарапшылары білім беру саласындағы жұмыспен қамту деңгейін және мұғалімдердің жалақыларын салыстырып, талдау жасаған.
Рейтинг көшбасшылары АҚШ, Ұлыбритания мен Германия болды, Гватемала – ең соңғы орында. Рейтингке қатысатын ТМД елдері ішінде Қазақстан тек Өзбекстаннан озған. Ресей, Украина, Беларусь және Әзербайжан алдымызға түсті.
2021 жылдың төртінші тоқсанында білім беру саласы қызметкерлерінің орташа жалақысы 219,2 мың теңге болғанын білеміз. Негізі, Қазақстанда орташа айлық 275,6 мың теңгеге жетті, яғни білім беру саласына қарағанда 25,7 пайызға артық. Сектордағы ең жоғары жалақыны жоғары оқу орны қызметкерлері (299 мың теңге), ең төмен жалақыны мектепке дейінгі білім беру мекемелерінің қызметкерлері (112,6 мың теңге) алады екен.
Өңірлер бойынша ең көп жалақы алатын елордадағы қызметкерлер – 344,5 мың теңге. Үштікке Алматы қаласы (265,4 мың теңге) мен Алматы облысы (247,4 мың теңге) кірді. Батыс Қазақстан облысында білім беру саласы қызметкерлерінің жалақысы аз, 181,7 мың теңге алады.
Салада 1,1 миллион адам жұмыс істейді. Жұмыспен қамтылғандардың көпшілігі Түркістан облысында – 142,9 мың адам. Ең азы Солтүстік Қазақстан облысында тіркелді – 35,2 мың адам.
