Индустрия және инфрақұрылымдық даму министрлігі баспасөз хатшысы Жанжігіт Омархан Facebook-тегі парақшасында бағдарламаның анық-қанығын түсіндіретін жазба жариялады.
Ол жеңілдікпен автокредиттеудің жаңа бағдарламаларын әзірлеу барысы туралы айтылған ақпараттың БАҚ-та сәл бұрмаланып берілуі осы посты жазуға итермелегенін атап өтті."ҚР ИИДМ автокөлік құрастыру басқармасының басшысы Руслан Хисамутдинов "Хабар" телеарнасына сұхбат беріп, жеңілдікпен автонесиелеудің жаңа бағдарламалары туралы әңгімелеп берді. Осы сұхбат негізінде kolesa.kz порталы "Жеңілдікпен автонесиелеудің жаңа бағдарламасы. Алғашқы мәліметтер" деген тақырыппен материал жариялап, кейін ол өзге де ақпарат құралдарына тарады. Бұл орайда бастапқы ақпарат сәл бұрмаланған", - деп жазды Ж.Омархан.
Атап айтқанда, оның айтуынша, Хисамутдинов айтқан "ұсынылады", "әзірленеді" және "пысықталады" сөздерінің орнына авторлар "болады", "ерекшеленеді" сияқты сөздерді қолданған. Осылайша оқырмандар мен көрермендер жеңілдікпен автокредиттеудің жаңа бағдарламасы жасалып, жақын арада іске қосылады деп қате ойлап қалуы мүмкін.
"Яғни, әлі зерттеліп, пысықталып жатқан бастамалар қазірдің өзінде қабылданған шешім ретінде жеткізілген. Осыған байланысты қазір уәкілетті мемлекеттік органдар жеңілдікпен автокредиттеудің жаңа бағдарламаларының 2 нұсқасын қарастырып жатқанын айтқым келеді. Бірінші нұсқада жеңілдікті несиелеуге 4 жылға (бірінші жылға – 30 миллиард) бөлінген 150 миллиард теңге (БАҚ-та айтылғандай 250 миллиард емес) бағыттау қарастырылуда. Кредит беру шарттарын 2015 жылдан іске қосылған ескі бағдарламалармен бірдей етіп қалдыру ұсынылып отыр", - деп хабарлады индустрия және инфрақұрылымдық даму министрінің баспасөз хатшысы.
Екінші ұсынылып отырған нұсқа халықтың әлеуметтік осал топтарына бастапқы жарнасыз кредит беруді қарастырады. Бұған дейін премьер-министр атап өткендей, оған "ӨКМ операторы" компаниясында жиналған қаражаттан шамамен 100 миллиард теңге бөлу ұсынылады.
Сондай-ақ, Жанжігіт Омархан бір адамға берілетін кредит шегін 7 миллион теңге қылу бастамасы талқыланып жатыр. Бұл ұсыныс қабылдана ма, жоқ па, ол жағы экономикалық тиімділігі мен мақсатына байланысты айқындалады.
"Қалай болғанда да, екі нұсқа да қазіргі уақытта межесіне жеткен жоқ. Олар ИИДМ ұсынған түрде қабылданбауы да мүмкін. Сондықтан нақты шешімдер туралы айтуға әлі ерте. Жалпы алғанда, 2022 жылы барлық құжаттық және заңдық процестер аяқталғанда жеңілдікпен автокредиттеудің жаңа бағдарламасы іске қосылады", - деп түйіндеді