Қарағандыда кондуктор оқушыны соққыға жыққан. Жергілікті автопарк өкілдері оқиғаға қатысты түсінік берді, - деп хабарлайды Tengrinews.kz.
Автобус ішіндегі оқиға туралы видео әлеуметтік желіде тарады. Желідегі ақпарат бойынша, оқиға №56 автобуста болған. Видеодағы жазбада "кондуктор оқушыда Onay картасының орнына оқушылардың картасы болғаны үшін төбелес шығарғаны" жазылған.
Қарағанды қаласындағы жолаушылар көлігі секторының меңгерушісі Асыл Түлеубаевтың сөзінше, бұл дерек бойынша тергеу басталған.
"Кондуктор жұмыстан шеттетілді. Кондуктор тарапынан кінәсі дәлелденген жағдайда қызметкер жұмыстан босатылады. Сонымен қатар, қалада электрон билеттеу жүйесі енгізіліп жатқанын хабарлаймыз. Ол арқылы жол жүруге арналған тариф енгізілгеннен кейін жұмыстың кондукторсыз схемасы қамтамасыз етіледі", - деді Асыл Түлеубаев.
