Үлкен жауапкершілік жүктеліп отыр
Мемлекет басшысы Қасым-Жомарт Тоқаев наурыз айындағы Жолдауында саяси реформаларды ұсынатынын айтқан болатын. Біз партия Төрағасының Жаңа Қазақстанды құру бойынша алға қойған міндеттерін сапалы әрі уақытылы орындау үшін барлық партиялық ресурстарды жұмылдырамыз. Әсіресе, бастауыш партия ұйымдарына басымдық беріледі. Қазір облысымызда 200-ден астам бастауыш ұйым бар. Бұл – үлкен күш. Партия Төрағасы Қасым-Жомарт Тоқаев: «Партияның одан әрі өміршеңдігі сайлауалды уәделердің қаншалықты орындалатынына байланысты екенін түсіну керек», – деді. Біз өңірлік сайлауалды бағдарламалардың іске асырылуына талдау жасап, орындалу сапасына ерекше назар аударып отырмыз. «Nur Otan» партиясының Атқарушы хатшысы Асхат Оралов өңірлік филиалдармен кеңесінде «Jas Otan» Жастар қанатының алдына да нақты міндеттер қойды. Мәселен, жастарды партия айналасына біріктіру, нақты жұмыс істейтін «әлеуметтік сатылар» құру, формалды іс-шаралардан бас тартып, жастардың барлық санаттарымен жұмысты жаңа форматта жүргізуі міндеттелді. Бүгінде «Jas Otan» ЖҚ-ның аймақтағы филиалы өңірдегі 33 жастар ұйымымен байланысын жандандыра бастады. Облыстық, қалалық және аудандық жастар ресурстық орталығымен бірлесіп, бұрын ұйымдаспаған жастармен және ауыл жастарымен жұмысты қолға алды. Ендеше партияны жаңғыртусыз саяси жаңғырту процесі мүмкін емес. «Nur Otan» партиясы еліміздің қоғамдық-саяси жағдайының сұраныстарына сәйкес, өз жұмысын күшейтуге дайын. Алдағы съезд партия трансформациясына мұрындық болмақ. Бұл маңызды жиында Қазақстанды демократияландырудың келесі кезеңі қаланады, қоғамды демократияландыру жалғасын табады.Ербол ДАНАҒҰЛОВ, «Nur Otan» партиясының Ақтөбе облыстық филиалы төрағасының бірінші орынбасары
Әрбір мүшесі жауапты
Елдегі жаңалану құқықтық негіздерді жаңғыртудан басталады. Біріншіден, Ата Заңды жөндеу керек. Егер сүйенетін идея керек болса, ол рухани идея болуы керек. Яғни, әділдік, адалдық, теңдік ұлықталуы керек. Егер осыны «Nur Otan» партиясы басшылыққа алса, халық алдындағы беделі өседі, елдің сеніміне ие болады. Кез келген қоғамның материалдық базасы мықты болуы үшін ортаңғы тап табысты дамып отыруы керек. Еліміздегі кедейлер санының көп екені анықталып жатыр. Демек, осы кезге дейін нақты статистика айтылмай келді. Өзін-өзі асырап, әрең күн көріп жүргендерді жұмыссыздарға жатқызбадық. Сөйтіп, қоғамдағы қордаланған күрделі мәселелерге үстірт қараушылық болды. Мұның барлығының «Nur Otan»-ның назарына тыс қалуы партияның салғырттығын білдіреді. «Nur Otan» барлық қайшылықты мәселелерге терең талдау жасап, оның шешімін табуда белсенділік танытпаса, жетекші партия болуы дәйектелмейді. Сондықтан партияның жиындарында оның әрбір мүшесінің қоғамдағы кемшіліктерге жауапты екені мойындалғаны абзал. Онсыз Жаңа Қазақстанды құруымыз өте қиын. Сондықтан да партия үлгі болуға тырысуы арқылы өз мәртебесін орнықтыра алмақ.Серік НҰРМҰРАТОВ, саясаттанушы