Биыл эпидемиологиялық жағдайдың жақсаруына байланысты мектеп бітірушілер арасында бітіру кеші өтеді. Бірақ шара мектеп қабырғасында ұйымдастырылуы тиіс, - деп жазады baribar.kz.
"Жоғары сынып оқушылары мектеп бітіруді асыға күтеді, өйткені бұл өмірдің жаңа кезеңін білдіреді. Кейінгі екі жылдағы мектеп пен ұстаздармен дәстүрлі қоштасуды індет бұзды. Бүгінгі таңда эпидемиологиялық жағдай кешті өткізуге мүмкіндік береді. Дегенмен олардың барлығы мектеп қабырғасында міндетті түрде орындалуы керек. Мектептердің қамқоршылық кеңестері мен білім бөлімдері түлектердің ата-аналарына аталған іс-шараларға жұмсаудың орынсыздығы туралы түсіндіру жұмыстарын жүргізуі қажет. Бұл — күн тәртібіндегі басты мәселелердің бірі", — деді ҚР БҒМ ҚДСО тәрбие жұмысы және қосымша білім бөлімінің басшысы Самал Қадырова.
Мектеп оқушыларының бітіру кешіне мектептің педагогикалық ұжымы, түлектер, түлектердің ата-аналары, педагогикалық еңбек ардагерлері, қамқоршылық кеңес мүшелері, демеуші ұйымдардың, облыстардың, Нұр-Сұлтан, Алматы, Шымкенттің білім басқармаларының өкілдері, бітіру іс-шараларына мүдделі мемлекеттік органдар және басқалары қатыса алады.
Бітіру кештерін білім беру ұйымының өзі өткізуі керек.
Рұқсат жоқ:
аниматорларды, мерекелік агенттіктерді, суретшілерді, мерекелік іс-шараларды өткізу үшін жеке студияларды шақыруға;
мерекелік дастархандарды ұйымдастыру;
жалға берілетін автокөліктерді шақыруға, қала (аудан) бойынша экскурсиялар өткізу;
мектеп әкімшілігі мен мұғалімдерге сыйлықтар үшін қаражат жинау;
ойын-сауық мекемелерінде кеш ұйымдастыру.
Қазақстанның барлық мектебінде соңғы қоңырау мерекесі 25 мамырда өтеді. Аттестаттардың салтанатты тапсырылуы – 16-17 маусымға жоспарланған.
