Жаңа Қазақстан дегеніміз – әділетті Қазақстан

Мемлекет басшысы «AMANAT» партиясының ке­зек­тен тыс XXIII съезіне қа­тыс­ты. Қасым-Жомарт Тоқаев съезд делегаттарына мем­лекет пен қо­ғамды түбегейлі жаңарту үдері­сі бас­талғанын айтты. Президенттің пікірінше, «AMANAT» осы жүйелі өзгерістерге белсене атса­лысып келеді. Сонымен қатар пар­тияның қолға алынған ре­фор­­маларға жан-жақты қолдау көр­сетіп, «Халық үніне құлақ аса­тын мемлекет» тұ­жырым­­да­масын тиімді жүзеге асыруға қо­сып жат­қан үлесіне тоқталды. – «AMANAT» әлеуметтік әділ­­­дік қағидатын ор­нық­тыруға әр­дайым баса мән бере­ді. Мем­ле­кет­тілік­ті ны­ғайту және ел бір­лігін бекемдеу – ұйымның ай­­­рықша мис­­­сиясының бірі. Өт­кен съез­де партияға ребрендинг ж­а­сау қолға алынды. Сондай-ақ оны институционалдық тұрғыдан жаңарту жұ­мысы басталды. Партия бұл мін­деттерді орындауға дереу кірісіп кетті. Нақты нә­тиже бар, өзгерістерді қазірдің өзін­­де көріп отырмыз. Осы қар­қынды бәсеңдетпей, жұ­мыс­ты одан әрі жалғастыру ке­рек, – деді Мемлекет басшысы. Президент наурыз айының ор­тасында Қазақ­стан халқына ар­наған Жолдауында саяси реформалардың ау­қымды бағдарламасын ұсын­ғанын ес­ке салды. Сонымен қатар бірден Конституцияға ен­гізілетін өзгеріс­тер мен толықтырулардың жоба­сын дайындау жөнінде ау­қым­ды жұ­мыс басталғанын, онсыз жоспарланған саяси реформаларды тиім­­ді жүзеге асыру мүмкін емес еке­нін атап өтті. – Конституциялық реформаның мақсаты – елімізді саяси тұр­ғыдан одан әрі жан-жақты жаң­ғыртудың берік іргетасын қа­лау. Өткен аптада Конституциялық кеңеске түзетулер жобасы жолданды. Оның қабылдануы мемлекеттік институттарды құрудың және қызметінің мүлде жаңа үлгісін – Жаңа Қазақстанды құру­ға мүмкіндік береді. Азаматтар тарапынан: «Жаңа Қазақстан дегеніміз не?» деген сауал жиі қойылып жүр. Менің ойымша, бұл сұраққа қысқа да нұсқа жауап беруге болады. Жаңа Қазақстан дегеніміз – шын мәнінде Әділетті Қазақстан. Азаматтарға әлеу­мет­тік әділдік жетіспейтінін мойын­дайықшы. Қарапайым ха­лық­тың мүддесі үнемі елене бер­мейді, кейде тіпті әділетсіздік мем­лекеттік аппарат өкілдері та­ра­­пынан да жасалып жатады. Аза­­маттардың мемлекеттік ме­ке­ме­­лерге сенімсіздігі осыдан туы­н­дайды. Сондықтан «AMANAT» партиясының алдында осы олқылықтардың орнын толтыру міндеті тұр. Азаматтық қоғам мен билік арасындағы дәнекер болу үшін сіздер халық өкілдерімен етене жұмыс істеулеріңіз керек, – деді Қасым-­Жомарт Тоқаев. Сонымен қатар Конституция­ға енгізілген өзгерістер мен толықтырулар елдің бүкіл саяси архитектурасын кешенді түрде қайта қарауға, билік тармақтары арасындағы тежеу мен тепе-теңдіктің неғұрлым теңгерімді жүйесін құруға бағытталғанын айтты. Президенттің пікірінше, біз суперпрезиденттік басқару түрінен түбегейлі бас тартамыз, Парламент пен мәслихаттардың өкілеттігін күшейтеміз. Партия­лық-саяси жүйені жаңғырту – басым бағыттың бірі. Мемлекет басшысы партиялар мен сайлау туралы заңнамаларды либерализациялау қоғамның рөлін күшейтеді. Бұл – биліктің барлық деңгейінде қабылданатын шешімдеріне қатысты. Президенттің пайымынша, азаматтардың дауысы үшін бәсеке күшейіп, саяси үдерістердің қарқыны мен мазмұны өзгереді. – Жалпы алғанда, партиялық алаңда сең қозғалғанын көріп отырмыз. «Adal» партиясының «AMANAT» партиясымен бірігу жөніндегі бастамасы – басталған өзгерістердің жарқын көрінісі. «Adal» партиясының жетекшілері мен мүшелеріне осы маңызды шешімдері үшін ризашылығымды білдіремін. Жаңа Қазақстанды құрамыз десек, елге жанашыр қоғамдық-саяси күштердің бәрі жұмылуы керек. Бұл ретте партиялардың өзара тіл табысып, саяси жүйені дамытуы аса маңызды. Сондықтан «Adal» партиясының бастамасын қолдап, онымен біріккен жөн деп санаймын. «Adal» – өз жақтастары бар, қалыптасқан партия. Саяси бәсеке артып келе жатқан қазіргі кезеңде мұның айрықша мәні зор, – деді Қасым-Жомарт Тоқаев. Жиында Мемлекет басшысы жауапты әрі аса маңызды кезеңге қадам басқанымызға тоқталды. Президенттің айтуынша, конституциялық реформа – тәуелсіздік тарихындағы жаңа белес. Мұның бәрі уақыт талабынан және қоғам сұранысынан туындап отыр. – Мен бұған дейін партия Төрағасы лауазымынан босап, ұйым қатарынан шығатынымды айттым. Осы ұйғарымды жүзеге асыратын кез келді. Бүгіннен бастап «AMANAT» партиясының Төрағасы ретінде өкілеттігімді тоқтатып, партиядан шығу туралы шешім қабылдадым. Бұл қадамның символдық мәні бар. Осы орайда Президент сайлауында маған сенім артып, қолдағандарыңыз үшін баршаңызға алғысымды айтамын. Сондай-ақ жауапты сәтте партия тізгінін сеніп тапсырғандарыңыз үшін ризашылығымды білдіремін. Біз бірлесіп, көп жұмыс атқардық. Дегенмен уақыт бір орында тұрмайды. Қазір талай нәрсе өзгеруде. Алдымызда ауқымды міндеттер бар. Бүгінде еліміздегі барлық саланы түбегейлі монополиядан арылту аса маңызды. Осы үдерістен саяси жүйе де сырт қалмауы керек. Мемлекет басшысы ешбір партияға басымдық бермегені жөн, яғни саяси тұрғыдан бейтарап болуы қажет. Бұл – менің айқын ұстанымым, – деді Қасым-Жомарт ­Тоқаев. Президенттің пікірінше, мұндай қағида сайлауға қатысатын барлық күштерге тең мүмкіндік туғызады. Саяси жүйеде әділдіктің орнауына жол ашады. Партия атқарушы билікке тәуелді болмаса, оған халықтың сенімі ныға­йып, беделі артады. – Қазір ұйым Мәжілісте және мәслихаттарда едәуір басымдыққа ие болып отыр. Сондықтан Үкімет пен әкімдіктердің жұмысына қатаң бақылау жасай алады. Президент партия қатарынан шыққанымен, ұйымның стратегиялық бағдары өзгермейді деп ойлаймын. «AMANAT» еліміздің саяси өмірінде ерекше орны бар ұйым ретінде қала беретіні анық. Саясаттағы сабақтастық сақталып, партия ел игілігі үшін жасап жатқан жұмыстарын жалғастыра береді, – деді Мемлекет басшысы. Қасым-Жомарт Тоқаев партия­ның Төрағасы лауазымына Парламент Мәжілісінің Төрағасы Ерлан Қошановты ұсынып, оған ұйымдастыру қабілеті жоғары, тәжірибелі әрі білікті азамат деп баға берді. Съезд делегаттары Президенттің ұсынысын қолдап, Ерлан Қошановтың кандидатурасына бірауыздан дауыс берді. Мемлекет басшысы бүгінгі өзгерістер «AMANAT» партиясының заман талабына сай жаңара түсуіне жол ашатынына сенім білдірді. Съезд барысында «AMANAT» партиясының Атқарушы хатшысы Асхат Оралов партияны трансформациялау бойынша атқарылып жатқан жұмыстарға тоқ­талды. Наурыздан бастап мобильді қоғамдық қабылдаулар өз жұмысын бастады. 196 ауылда барлығы 163 мобильді қабылдау өткізіліп, олардың барысында 2,1 мыңнан астам азаматтың талап-тілегі тыңдалды. 400-ден астам мәселе оң шешімін тауып, қалғандары бақылауға алынды. Маусым айының соңына дейін мобильді қоғамдық қабылдаулар өңірлердегі 500-ге жуық шалғай ауылға барады. Орталықсыздандыру аясында жарналардың 20%-ы бастауыш партия ұйымдарына қайтарыла бастады. Осы бастаманы іске асыру нәтижесінде бастауыш партия ұйымдары 300-ден астам іс-шара өткізуге мүмкіндік алады. Мәжіліс пен мәслихаттардағы фракция қызметін жандандыру мақсатында қоғамдық кеңестер саны 40%-ға қысқартылды. Олардың құрамы да жаңартылып, елдің сөзін сөйлейтін белсенді азаматтар тартылды. Жалпы, әйелдердің үлесі 39%-ға дейін, ал жастардың үлесі 30%-ға дейін артты. Сонымен қатар Үкіметпен және партияның Мәжілістегі фракциясымен бірлесіп сайлауалды бағдарламаның орындалуына тексеру жүргізілді. «Ашық партия» тұжырымдамасы аясында «TALQYLAU» диалог алаңы іске қосылды. Қазірдің өзінде БАҚ-тың қатысуымен және әлеуметтік желілерде тікелей трансляция арқылы ел тұрғындарын толғандыратын өзекті тақырыптарға арналған 2 отырысы өтті. Халықпен кері байланысты нығайту мақсатында «AMANAT» партиясының атқарып жатқан жұмыстарын үздіксіз жариялап отыру үшін партиялық баспасөз орталығы ашылды. Съезд барысында Парламент Сенатының Төрағасы, «AMANAT» партиясы Саяси кеңесі Бюросының мүшесі Мәулен Әшімбаев, «Adal» саяси партиясының хатшысы Эльдар Жұмағазиев, Парламент Мәжілісінің депутаты, «AMANAT» партиясы Саяси кеңесінің мүшесі Снежанна Имашева, Семей қаласы мәслихатының депутаты, «AMANAT» партиясы Жастар қанатының белсендісі Еркебұлан Тұрсын сөз сөйледі. Съезд делегаттары «Adal» партиясының «АМАNАТ» партиясына қосылуына және «АМАNАТ»партиясы Саяси кеңесінің құрамына Эльдар Жұмағазиев, Мақсат Толықбай және Дәулет Мұқаевтың қосылуын қолдап дауыс берді.