Шымкентте қараусыз қалған карьердегі суға батқан жасөспірім қаза тапты. Оның мәйітін жедел құтқару жасағы судан алып шықты.
Облыстық ТЖД-ның мәліметінше, оқиға 2 мамыр күні сағат 14:45 шамасында болған.
«Қайтпас-1» ықшамауданында 15 жастағы бала қараусыз қалған карьердің шұңқырына жиналған суға шомылған. Іле-шала суға батып кеткен.
Оқиға орнына Шымкент қаласы ТЖД 5 қызметкері, жедел құтқару жасағының 4 құтқарушы сүңгуірі, 1 техника, 1 жүзу құралы тартылды.
«Жедел құтқару жасағы баланың мәйітін су астынан іздестірді. Күндізгі сағат 16:20-да суға батып кеткен жасөспірімнің мәйітін тапты. Қаратау ауданының полициясы сот-медициналық сараптама тағайындап, оқиғаның мән-жайын анықтап жатыр» делінген хабарламада.
