Үкімет басшысы Әлихан Смайылов шетелдік инвесторлармен мұнай-газ мәселесін талқылады

Үкімет басшысы Әлихан Смайылов шетелдік инвесторлармен мұнай-газ мәселесін талқылады 1
Фото: primeminister.kz

Әлихан Смайылов J.P. Morgan және TotalEnergies SE басшыларымен кездесті. Бұл туралы Премьер-Министрдің баспасөз қызметі хабарлады.

Премьер-Министр Әлихан Смайылов Президент жанындағы Шетелдік инвесторлар кеңесінің 34-пленарлық отырысы аясында J.P.Morgan инвестициялық банкі мен TotalEnergies SE француз мұнай-газ компаниясы өкілдерімен кездесті.

 

Үкімет басшысы Әлихан Смайылов шетелдік инвесторлармен мұнай-газ мәселесін талқылады

TotalEnergies SE аға вице-президенті Жулиен Пужемен әңгімелесу барысында компанияның Қазақстандағы мұнай-газ саласындағы қызметі, жел энергетикасындағы жобаларды іске асыру және экономиканы декарбонизациялау мәселелері талқыланды.

TotalEnergies SE – еліміздегі ең ірі инвесторлардың бірі, Қашаған және Доңға жобаларына белсенді түрде қатысып келеді. Бұдан бөлек, компания Қызылорда және Жамбыл облыстарында күн энергетикасы саласында екі жобаны іске асырды.

«Сіздердің Қазақстанға деген қызығушылығыңызды қолдаймыз және мұнай-газ саласындағы инвестициялық жоспарларды іске асыруға көмек көрсетуге дайынбыз», – деді Әлихан Смайылов.

J.P.Morgan компаниясының Ресей және ТМД елдеріндегі президенті Ян Тавровскиймен жаһандық макроэкономикалық ахуал, халықаралық қаржы ұйымдарымен өзара іс-қимыл, Қазақстанның әлемдік капитал нарығына шығу жөніндегі жоспарлары талқыланды.

Үкімет басшысы J.P.Morgan компаниясының Қазақстанда 20 жыл бойы жұмыс істеп келе жатқанын және осы уақыт ішінде клиенттердің ең күрделі мәселелерін шешуге қабілетті сенімді және тұрақты серіктес ретінде танылғанын атап өтті.

«Біз үшін декарбонизациялау аясында осы жоспарларды іске асыру өте маңызды. J.P.Morgan құзыреттілігін ESG стандарттарын әзірлеу және оларды жобаларымызда дұрыс қолдану үшін пайдаланғымыз келеді», – деді Әлихан Смайылов.

Aikyn.kz | Бүгінгі жаңалықтар. Әлем және Қазақстан жаңалықтары.