Тұрмыстық қиындықтар жүдеткен немесе әділдік іздеп шарқ ұрған адамдардың көпшілігі
«AMANAT» партиясына келіп шағымданады. Еліміз ту тіккен астана болғандықтан шығар, әсіресе Сақтаған Сәдуақасов төрағалық ететін Нұр-Сұлтан қалалық филиалына жүгінетіндердің қатары қалың. Саяси ұйым кеңсесінің табалдырығын аттағандардың талайы «жоғын» тауып, өтініштерін қанағаттандырып жатады. Енді солардың біразына шолу жасап көрейік.Науқас жандар көмекке мұқтаж
«AMANAT» партиясының қалалық филиалына астма, қант диабеті диагнозы бар қала тұрғыны Фарида Тобағұлова жүгінді. Өзі пульмонологтың есебінде тұрады екен. Бірақ дәрігерлер әйелдің мүгедектік тобын анықтай алмаған. Сол себепті саяси ұйымның астаналық филиалы Ф.Тобағұловамен Еңбек және халықты әлеуметтік қорғау министрлігі Еңбек, әлеуметтік қорғау және көші-қон комитетінің Нұр-Сұлтан қаласы бойынша департаментінің басшысы Қ. Тоқтыбаевтың кездесуін ұйымдастырды. Соның нәтижесінде, науқас №1 қалалық емханаға жатқызылып, тексерілді. Арызданушыға мүгедектікті куәландыратын құжаттарды жинауға көмектесті. Енді ол бұдан былай емханадан дәрі-дәрмек алып тұратын болды.
Ф. Тобағұловаға мүгедектіктің ІІ тобы тағайындалды. Мүгедектігі бойынша жәрдемақы 30 мың теңгені құрайтын болды. Өтініш беруші елордалық партия филиалына көрсеткен көмегі үшін алғысын білдірді.
Ал саяси ұйымның қалалық филиалына жүгінген елордалық Гүлнар Кизабекова ерекше күтімді қажет ететін баласының тістерін емдеуге көмек сұрапты. Бұл мәселені шешу үшін Гүлнар қалалық мәслихаттың депутаты Динара Байсеркинаның қабылдауына жазылған.
Қабылдау кезінде ананың өтініші қанағаттандырылып, ұлы Нұрлыханды отаға дайындау үшін кешенді тексеру жүргізілді. Процедураға әзірлік оңай болған жоқ, өйткені оның емі ерекше тәсілді қажет етті. Сөйтіп, Нұрлыхан Қизабековтың 17 тісіне ота сәтті өтті. Отаны TIARA тіс емханасында өз ісінің жоғары білікті мамандары жасады. Гүлнар Кизабекова аманаттықтарға мәселені шешуге көмек көрсеткені үшін алғыс білдірді.
Сондай-ақ партияның қалалық филиалына бас сұққан көпбалалы ана, ІІІ топтағы мүгедек баланы тәрбиелеп отырған Қарақат Хурмет басындағы ауыр жағдайын айтты. Оның тапқан табысы дәрі-дәрмек, азық-түлік және пәтерақыдан аспайтын көрінеді. Соның салдарынан балаларын шынықтыруға, ақылы демалыс орындарына жіберуге жағдайы жетпейтінін айтқан.
Осы мәселені шешу үшін «AMANAT» партиясы қала әкімдігінің Білім және Әлеуметтік қорғау басқармаларына сұрау жіберді. Қос басқарма Қарақатты қабылдап, өтінішімен танысты. Нәтижесінде, оның балаларына бассейнге тегін кіруге мүміндік берілді.
Тұрмыстық мәселелер қажытады
Саяси ұйымның астаналық филиалына Майра Қасенова мәселе айта келді. Ол өзі тұратын үйдің қыста суық болатынын жеткізді. Себебі жылу жүйесі жиі тоқтап, баспананың іші суып кетеді екен. ПИК оның өтінішіне назар аудармапты.
Бұл мәселені шешу үшін «AMANAT» партиясы қалалық әкімдікке сұрау жіберді. Майраны Байқоңыр ауданының әкімі Е.Жаулыбаев қабылдады. Қабылдаудан кейін әкім Майраның үйіне барып, жылу жүйесінің жөндеу жұмысы бойынша тиісті қызметтерге тапсырма берді.
Бұл мәселе оң шешімін тапты. Тұрғын үй кешені жылыту маусымына дайын. Одан бөлек, МИБ құрылып, төраға тағайындалды.
Ал партияның филиалына арыздана келген Байқоңыр ауданының тұрғыны, зейнеткер Владислав Николаев көпқабатты үйдің тозығы жеткен баспалдағынан құлап кеткенін айтқан. Бұл тұрғын үйде жеделсаты жоқ екен, сондықтан баспалдақты тез арада жөндеу қажет.
Аталған мәселені шешу үшін В.Николаев Байқоңыр ауданының әкімі Е.Жаулыбаевтың онлайн қабылдауына жазылды. Қабылдаудан кейін тиісті мамандар зейнеткердің мекенжайына барып, жағдайды өз көзімен көріп, тексерді. Нәтижесінде, баспалдақ жөнделді.
Сондай-ақ қалалық партия филиалына жалғызбасты ана У. Нұржанова арыздана келді, оның ұлы Е. Абайбек №50 мектеп-лицейдің 10-сыныбында оқиды. Бозбала бұрын «Зерде» оқу орталығына барған екен, бірақ отбасылық жағдайға байланысты сабаққа қатыса алмай қалған. Ал енді ҰБТ-ға дайындалу үшін қосымша сабақ алу қажеттігі туындаған.
Аталған мәселені шешу үшін өтініш берушіге қалалық Білім басқармасы басшысы орынбасарының онлайн қабылдауына жазылу ұсынылды. Білім басқармасы басшысының орынбасары М.Кайырбаева өткізген онлайн қабылдауда №50 мектеп-лицейдің мұғалімдері ҰБТ-ға дайындық бойынша қосымша сабақтар тегін ұйымдастырылатынын хабарлады. Мектеп мұғалімдері түлектерді ҰБТ-ға дайындаудың бірлескен жоспарын әзірлеген.
У. Нұржанова партияның қалалық филиалына азаматтардың әл-ауқатын арттыру, отбасы институтын нығайту және өсіп келе жатқан жас ұрпақтың тәлім-тәрбиесі мен білімін дамыту бойынша жасап жатқан іс-шаралары үшін алғысын білдірді.
«AMANAT» партиясының қалалық филиалына Нұр-Сұлтан қаласының тұрғыны Әсел Сәрсембаева жүгінді. Ол жалғыз өзі 3-сыныпта оқитын кәмелетке толмаған қызды тәрбиелеп отыр. Ә. Сәрсембаева күні бойы жұмыс істейді, қызы мектепте болады. Алимент алмайды. Жаз айында кішкентай қызы үйде жалғыз қалады. Сол себепті өтініш беруші қызына жазғы лагерьге жолдама сұратқан.
Бұл мәселені шешу үшін өтініш беруші қалалық мәслихаттың депутаты А. Өмірзақовтың қабылдауына жазылды. Депутат өз қаражаты есебінен оқушыны жазғы лагерьге жіберу үшін ақша бөлді. Енді маусым айында Ә.Сәрсембаеваның қызы «Звездный континент» жазғы лагеріне баратын болды.
Депутаттар қол ұшын созды
Астаналық М.Қошмағамбетов Р.Қошқарбаев даңғылы 26-үйдің және «Сказочный мир» тұрғын үй кешені, 26 үй тұрғындарының арызын қалалық мәслихат депутаты Динара Оразалинаға жеткізген. Олар үй маңындағы автокөлік қозғалысын реттеу бойынша өзекті мәселе көтерген.
Нәтижесінде, Р.Қошқарбаев даңғылынан жол жиегіне бұрылатын жолайрық жасалып, 26 және 28 үйлер арасында оңға бұрылатын автокөліктердің кедергісіз және апатсыз өтуі қамтамасыз етіледі. Сондай-ақ «Алатау» дүкені тұсынан Аманжолов көшесінің бойымен шығуға екі жерде біржақты қозғалыс белгілері орнатылды.
Нұр-Сұлтан қаласы мәслихатының депутаты Азамат Орынбасаров кәмелетке толмаған екі баланы жалғыз өзі тәрбиелеп отырған Ж.Алкееваны қабылдаған. Оның 14 жастағы үлкен қызына стоматологиялық ем қажет болған.
Қабылдаудан кейін Ж.Алкееваға брекеттер сатып алуға ақша бөлінді. Қалалық мәслихат депутаты С.Шукшев кәмелетке толмаған екі баланы тәрбиелеп отырған Назгүл Шохаевамен арызы бойынша кездесті. Шағымданушы ІІІ топ мүгедегі, эпилепсия сырқатымен ауырады. Жалға алған бөлмеде өмір сүруге ешқандай жағдай жасалмаған. Бөлмеде ешқандай жиһаз жоқ. Балалар сабақты еденде отырып оқитын көрінеді. Өтініш беруші жұмыс істемейді, өйткені кіші баласы – 2 жаста.
Қабылдаудан кейін депутат С.Шукшев Н.Шохаева тұрған үйге барып, жағдаймен танысты. Осы сапардан кейін ол өз қаражаты есебінен пәтерді жиһазбен жабдықтауға ақша бөлді.
Назгүл Шохаева өзін екі баласымен осындай қиын жағдайда қалдырмаған партияның қалалық филиалына, қаржылай көмек көрсеткен қалалық мәслихаттың депутаты С.Шукшевке шын жүректен алғысын білдірді.
Өздеріңіз көріп отырғандай, «AMANAT» партиясының Нұр-Сұлтан қалалық филиалына арызданып келушілер аз емес. Олардың бәрінің өтініш-тілегі мұқият тыңдалып, мүмкіндігінше көмек көрсетіліп жатыр. Бұл жұмыстар алдағы уақытта да жалғасын табары сөзсіз.
