Күні кеше 23 маусымда сағат 20.00-де Жамбыл облысы Қордай ауданы Үлкен Сұлутөр ауылында нөсер жаңбырдан кейін Ырғайты өзені тасыды.
Нәтижесінде, ауылдың жолдарын су басты. Сондай-ақ су ағынының салдарынан жеке тұрғын үйлердің 2 шаруашылық құрылысы қирады. Қаза болғандар мен зардап шеккендер жоқ. Алдын ала мәлімет бойынша, мал шығыны бар. Жергілікті атқарушы органның комиссиясы келген залал мөлшерін анықтап жатыр.
Оқиға орнына Төтенше жағдайлар департаментінен 8 қызметкер, 2 бірлік техника, жергілікті атқару органдарынан 5 қызметкер және 2 бірлік техника барған.
Сонымен қатар сағат 23.25-те Қордай ауданы Шарбақты ауылынан 4 шақырым жерде Ырғайты өзенінде нөсер жауын-шашынның салдарынан су деңгейі көтеріліп кеткен. Оның жағасында 11 адам демалып жатқан. Су тасығанда 6 адам дөңес жердегі аралда көлік ішінде қалып қойған.
Тасқын су демалушылардың екінші көлігін шайып кеткен. 24 маусымда сағат 01.15-те ТЖД құтқарушылары аралда қалған барлық адамдарды құтқарды. Оларға медициналық көмек қажет болмады. Қаза болғандар мен зардап шеккендер жоқ.
