«Басқармада кәсіпкерлікті дамыту жұмыстары бойынша жұмыссыз жандарға қолдау көрсетіледі. Оларға «Бастау Бизнес» жобасы аясында кәсіпкерлік негіздері оқытылса, «кәсіп бастап, жұмыс істеймін» деп құлшыныс білдіргендерге, яғни жаңа бизнес идеяларды жүзеге асырамын деушілерге қайтарымсыз мемлекеттік грант беріледі. Бұл ұлттық жоба аясында жүзеге асуда. Қайтарымсыз грант бұған дейінгі жылдары курс оқыған, сертификаты бар азаматтарға беріліп жатыр. 1-14 сәуір аралығында вusiness.enbek.kz порталында азаматтардан өтінімдер қабылданып, ол 26-28 сәуір күндері комиссияда қаралды. 437 өтінім қабылданып, оның 336-сы комиссияға ұсынылды. Қаралым нәтижесінде, тиісті санаттарға жататын 226 азаматқа оң шешім қабылданып, 110-на бас тартылды. Грант бөлінетін азаматтардың ішінен 69-ы жастар санаты болса, 157-сі халықтың осал топтарынан болып отыр. Биыл грант көлемі екі есеге, яғни 1 225 200 теңгеге көбейген. Сонымен қатар грант берудің жаңа қағидалары бекітілген. Бұл қаржыға жастар және халықтың әлеуметтік осал топтарындағы азаматтар, оның ішінде атаулы әлеуметтік көмек алушылар, көп балалы отбасылар, қоныс аударушылар, қандастар, мүгедектігі бар адамдар және мүгедек баланы тәрбиелеушіге берілетін жәрдемақыны алатын жұмыссыз азаматтар үміткер бола алады», – дейді Балмаржан Полатқызы.Жаңа жобалар жемісін беруде Биыл осынау кәсіпкерлікті дамыту ұлттық жобасы аясында «Ұрпақтар келісімшарты» атты жаңа жоба жүзеге асырылып жатқанын да еске салайық. Бұл жас мамандарға жұмыс ұсыну әрі зейнеткерлікке шығатын мамандардың орнын ауыстыру процесіне дайындық. Демек, зейнетке шығатын қызметкер жас маманды өз орнына дайындайды. Жобаға оқуды аяқтағанына екі жылдан аспаған және жасы 29-дан аспаған түлектер қатыса алады. Ол зейнетке шығуға кемінде 6 ай уақыты қалған қызметкерді алмастырады. Кейін мекеме басшысы жас маманды сол зейнетке кеткен адамның орнына немесе өзге бос жұмыс орнына ауыстыруға міндетті. Бұл жобаға қатысушыға мемлекет тарапынан 6 ай бойы 95 400 теңге көлемінде жалақы төленеді. Шымкентте биыл жыл басынан бері осынау жобаға 24 адам қатысқан. Сонымен қатар биылғы жаңалықтың бірі – зейнет жасына 2 жыл қалған жұмыссыз азаматтарды қолдау үшін «Күміс жас» жобасы қолға алынған. Бағдарлама аясында зейнеткерлікке шығуға 2 жыл қалған азаматтар уақытша жұмыспен қамтылады. «Күміс жас» жобасына қатысушылар жалақысының жартысын мемлекет, жартысын жұмыс беруші төлейді. Жобаға қатысу мерзімі 12 айдан аспайды. Одан соң жұмыс беруші зейнет жасына жақындаған адамды зейнетке шыққанға дейін тұрақты жұмысқа алуға міндетті. Бұл да болса зейнетке шығар алдында зейнетақысының жақсы көлемде шығуы үшін жасы ұлғайған жандарға үлкен қолдау. Мемлекет тарапынан жасалып жатқан мұндай қолдаулар еліміздің азаматтарына едәуір шабыт беретіні сөзсіз. Шымкент қаласында «Күміс жас» жобасына 192 адам қатысып жатыр. Жалпы, Шымкент қаласының 2021-2025 жылдарға арналған даму жоспары бойынша 2022 жылға 24 196 жұмыс орны құрылатыны жоспарланып отыр. Оның 14 517-і тұрақты, 9679-ы уақытша жұмыс орны. Ал, 10 552-і ұлттық жоба аясында жүзеге асады. Бүгінге дейін 8 226 жұмыс орны ашылған. Бұдан бөлек, Шымкентте Тәуелсіздіктің 30 жылдығы қарсаңында мүмкіндігі шектеулі жандар үшін «Тең қоғам» әлеуметтік қолдау орталығы ашылған.
Бұл орталық мүмкіндігі шектеулі азаматтарға түрлі қызметтер көрсетіп, олардың бас қосатын орнына айналған. Басқарма басшысы мүмкіндігі шектеулі азаматтарға қолдау көрсету – мемлекеттің әлеуметтік саясатының басым бағыттарының бірі екенін, оларға мемлекеттік жәрдемақымен қоса, медициналық оңалту және ем түрлері көрсетілетінін атап өтті. «Шымкент қаласында 36 мыңнан астам мүмкіндігі шектеулі жан өмір сүруде. Оның ішінде 6 мыңнан астамы кәмелет жасқа толмағандар. Біз оларға өздерін қоғамның толыққанды мүшесі екенін сезіндіруміз қажет. Бұл ретте мүгедектерді оңалту мен оларды қоғамға кіріктіру міндеттерін сапалы жүзеге асырудың маңызы зор. Әлеуметтік қолдау орталығы аталған міндетті орындауға септігін тигізеді», – деді Балмаржан Нарбекова.«Тең қоғам» әлеуметтік қолдау орталығы «бір терезе» қағидасымен 5 бағытта қызмет көрсетеді. Мұнда дәрігер мен психолог жұмыс істейді. Мүмкіндігі шектеулі азаматтарды жұмысқа орналастыруға баса назар аударылған. Сондай-ақ бұл жерде мүмкіндігі шектеулі азаматтар әлеуметтік порталдың қызметін өз бетінше үйрене алады. Мұқтаждардың мұңы тыңдалады Үшінші мегаполисте 84 мыңға жуық зейнеткер бар. 43 446 көпбалалы ана болса, оның 11 мыңға жуығы «Алтын алқа» және «Күміс алқа» иегерлері. Аталған санаттағы азаматтарға мереке және атаулы күндері бірреттік көмек беріліп тұрады. Қариялар санаториялық емдеу-сауықтыру орындарына жіберіліп, олар мерзімді баспасөзге жаздырып беру шараларынан да шет қалмайды. Сондай-ақ 37 337 мүмкіндігі шектеулі азаматқа әлеуметтік қолдау шаралары жүргізілуде. Мүгедектерге арнайы жабдықталған 18 «Инватакси», 55 «Әлеуметтік такси» көлігі қызмет көрсетсе, олар қажетіне қарай сурдотехникалық, тифлотехникалық, гигиеналық құралдар, мүгедектерге арналған қоларбамен қамтылады. Әлеуметтік портал мен ЭЦК-мен жұмыс істеу үшін мүгедектігі бар азаматтарға басқарма ғиматтарында өз-өзіне қызмет көрсету бұрыштамасы ұйымдастырылған және Басқарма қызметкерлерімен әрбір адамға жеке-жеке көмек беріледі. Енді психоневрологиялық патологиялары бар мүгедек адамдарға қосымша №1 арнаулы әлеуметтік қызметтер көрсету орталығы жанынан 50 орындық ғимарат салуға ұсыныс беріліп отыр. Жоғарыда атап өткендей, басқарма көші-қон мәселесін де реттейді. Шымкент қаласында жыл басынан бері 353 адам, 256 отбасы «қандас» мәртебесін алған. Қоныс аударғандардың басым бөлігі – Өзбекстан Республикасынан келгендер. Әлеуметтік саладағы жұмыстар мұнымен тоқтамайды. Оларға мемлекеттен қолдау барда оны үйлестіретін мекеменің де жұмысы тоқтамақ емес.
Шымкент қаласы