«Әр аурудың өршитін маусымы болады. Коронавирус көбіне жаз мезгілінде, әсіресе күн қатты ысыған уақытта өршитінін алдыңғы екі жылдың тәжірибесі көрсетіп отыр. Болжам бойынша, биыл 2020-2021 жылдардағыдай асқыну көрсеткіші болмайды. Оның үстіне, бүгінде халықтың басым бөлігі вакцина алды, ревакцинадан өтті. Коронавирустың оң нәтижесі анықталған күннің өзінде алдыңғы жылдардағыдай өлім көрсеткіші болмайды. Бұдан былай Covid-19 бізбен өмір сүреді, ол маусымдық аурулар сипатына ие. Сондықтан жыл сайын оның асқыну кезеңінен қорқудың орнына, алдын алу шараларына мұқият болуымыз керек», – дейді Нұргүл Берекетқызы.Елімізде коронавирус инфекциясына қарсы вакцинаның бірінші компонентін 9,6 млн, ал екіншісін 9,4 миллионға жуық адам салдырған. 6 қыркүйекте еліміздің 1,2 миллиондай тұрғыны Pfizer вакцинасының I және ІІ дозасын алды. Эпидемиологтың айтуынша, халыққа вакцина алу «мәдениетін» ковид үйретті. Әйтпесе, жыл сайын ЖРВИ мен тұмауға қарсы тегін екпе салдыруға болады. Мұны көп тұрғын құнттамайды. Сәйкесінше, күн суыған бойда еңбектеген баладан еңкейге кәріге дейін аурудан көз ашпайды.
«ЖРВИ мен тұмаудың өршитін кезеңі жақындап келеді. Бұл ауру түрлерін коронавируспен байланыстыруға болмайды, өйткені олардың қоздырғыштары әртүрлі. Әйтсе де, кез келген ауру иммунитетті әлсірететінін ескерсек, ауру белгілері ЖРВИ-мен басталып, коронавирусқа жалғасуы әбден ықтимал», – деп атап өтті маман.ДСМ Санитариялық-эпидемиологиялық бақылау комитеті тұмауға қарсы вакцинациялау биыл 1 қазанда басталатынын айтты.
«Қазіргі уақытта коронавирусқа қатысты жағдай тұрақты. ЖРВИ және тұмау ауруларының маусымы жақындап келеді. Бұл орайда Денсаулық сақтау министрлігі бірқатар шара атқарып жатыр: медициналық ұйымдардың науқастарды қабылдауға дайындығын, ауруханалардың кіреберісіне фильтр қою, диагностика жасайтын зертханалар жұмысын, қажет болған жағдайда науқасты үйіне барып, ем тағайындау мүмкіндігін қамтамасыз етуде. 1 қазаннан бастап тұмауға қарсы вакцинациялау басталады», – деді Инфекциялық ауруларды эпидемиологиялық бақылау басқармасының басшысы Роза Қожапова.Алайда эпидемиолог-дәрігер Нұргүл Аманжолова ЖРВИ мен тұмауға қарсы екпе қыркүйектің басында салынуы керек деп есептейді. Сонда эпидемиологиялық кезең басталғанға дейінгі бір айда тұрғындарда иммунитет қалыптасып үлгереді. Ал қазан айы бұл екі ауру түрлерінің дәл асқынатын кезеңі болып есептеледі. Өкінішке қарай, вакцина қай кезеңде салынса да, ЖРВИ мен тұмауға қарсы екпе алуға көп халық құлықсыз. Жалпы тәжірибедегі дәрігер Әйгерім Омаршанованың айтуынша, тұрғындардың арасында кез келген инфекцияға қатысты екі қате түсінік бар.
«Біріншісі, вакцинаның вирусқа қарсы антидене қалыптастыра алатынына сенбейді. Мәселен, ЖРВИ мен тұмауға қарсы екпені көбіне көп қариялар алады, оның өзінде, вакцина іздеп, емхананың табалдырығын тозыратынның көбі – орыс әжейлер. Ересектердің арасында екпе салдыратындар тіптен сирек. Әрі баласына салдыруға да көп ата-ана қарсы болып жатады. Есесіне, күн суытып, ЖРВИ мен тұмау асқынғанда, халық түрлі антибиотик ішуден, ине салдырудан қорықпайды. Мұның ағзаға зиянын зерттеп жатқан ешкім жоқ. Екіншісі, халық өзін-өзі емдеуге құмар. Кез келген ауру дұрыс емделмесе, оның түрлі салдары болуы мүмкін. Мәселен, антибиотик тағайындаудың бекітілген нормасы мен уақыты болады – 3, 5, 7 күн және түріне қарай күніне екі-үш рет. Ал біздің тұрғындар ауырған бойда дәрігермен кеңеспей уыстап антибиотик ішіп бастайды да, жағдайы сәл тұрақталса, дәрі ішуді ұмытып кетеді. Сондай-ақ антибиотик қабылдаған соң пробиотик ішу дегенді мүлдем білмейді. Біздің коронавирустан ғана қорқып, тек сол вирусқа қарсы екпе салдыруымыз қате. Кез келген аурудың, тіпті халық өзі «емдеуге» құмар ЖРВИ мен тұмаудың да адам ағзасына қауіпті салдары болады. Сондықтан кез келген ауру түрлерінің белгілеріне жауапты қарау, дәрігерге қаралу, маманмен кеңесу, толыққанды ем-дом алу, алдын алу үшін екпе салдыру мәдениетін қалыптастыру керек», – дейді дәрігер.Қорыта айтқанда, Covid-19 инфекциясының беті қайтты дегенімізбен, эпидемиологтардың байламынша, күз айларында асқынатын ЖРВИ мен тұмау маусымы халықтың иммунитетін төмендетуі, ал бұл жағдай коронавирусты қайта өршітуі ықтимал. Сол себепті халық тек ковидтен емес, жалпы ЖРВИ мен тұмау сияқты вирустан сақтану шараларына мұқият болып, уақтылы ем-дом қабылдап, дәрігердің кеңесіне жүгінуі керек. Әрі вакцина алу маңызды және тек ковидке қарсы емес!
Айдана НҰРМҰХАН