Балаларды бақытқа бөлеген түн

балаларды бақытқа бөлеген түн

Кей кезде балалардың кітап оқудан алшақтап кеткені жайлы пікірлер жиі айтылады. Дегенмен жаңа заманның жаңа буыны құнды қазынадан алыс емес секілді. Әрбірінің білуге, тануға деген құштарлығы мол. Таяуда Астанадағы Орталық балалар және жасөспірімдер кітапханасында «Ай сәулесімен кітап оқиық» атты кітапхана түні өтті. Біз де өзгелердей қызығушылық танытқан балалар аз болар деп болжағанбыз. Алайда жаңылыппыз, кітапханада адам қарасының көптігі сонша, ішіне бас сұғу қиын болды.

Әуелде әдеттегі іс-шаралардағы тәрізді алдын ала шақырылғандар жүр деп ойлаған едік. Бірақ көзімізбен көріп, құлағымыз естігеннен кейін, бүлдіршіндердің кітапқа махаббаты ерекше екенін аңғардық. Іс-шара басында қазақтың дәстүрлі әндері шырқалып, мерекелік думан өтті. Қонақтардың біразы таң қалып, тамсанғанын көрдік. Кешкі сағат 19:00-ден 23:00-ге дейін, 4 сағат бойы кітап көрмесі, кітап алмасу мен шығармашылық кездесулер өтті. Кітапхананың әр бұрышында, әр залда адам лық толып, кей сөрелердің жанында кішігірім пікірталас болып жатқанын байқа­дық. Жалпы саны 200-ден астам адамның бір мезетте «кітап ордасына» жиылғаны тәнті қыл­ды. Демек, қазір үлкен де, кіші де балалар әде­биетіне ерекше мән береді. Бұл тұста ұйымдастырушылардың тапқырлығына да дән риза болдық. «Мадагаскар» мультфильміндегі кейіпкерлердің костюмін киген жандар бала­лар­ды одан әрі қызықтырып, белсенді болуына ықпал етті.

Бұдан соң жиын кітап авторларымен кез­десуде жалғасты. «Менің қолтаңбам» кітапхана жобасының аясында балалар жазушысы Серік­бол Хасан мен Толымбек Әбдірайым бүлдіршін­дермен ашық әңгіме айтып, қызықты оқиға­ларын баяндады. Жазушылардың қолтаңбасын алуға асыққан балаларды көріп, жас оқырман­дардың қатары көбеймесе, азаймасына илан­дық.

– Маңызды кештің куәсі болып отырмыз. Кітап оқуды құр ұрандатып емес, осылай балаларды жан-жақты қызықтырып насихаттау керек. Балаға әсер ете алатын әңгіме айтып, тілін тапсақ, оларды тәрбиелеудің жолын білгеніміз. Кітапта барлық адамзатқа қажетті құндылық бар. Бүлдіршіндер оны білмейді емес, біледі. Жазушылармен кездесуде балалардың қалай сұрақ қойып, кітап ұстап шапқылап жүргенін көрдік. Бұдан асқан қуаныштың болуы мүмкін бе? Балалардың кітап арқалап жүргеніне қарасаңыз, бойыңызда болашаққа деген шексіз сенім пайда болады. Біз мұны мақтаныш етуге тиіспіз, – дейді Толымбек Әбдірайым.

Оқушылар балалар ақыны Дария Жұмагел­дин­ова­ның шығармашылығымен де белсене танысты. Сондай-ақ BookDating спикерлері, журналист, «Тұмар-2021» Ұлттық телевизиялық сыйлығының лауреаты Руслан Ыдырысов, ғалым Жақсылық Сәбитов, танымал радио және тележүргізуші Әйгерім Есенәлі сүйікті кітаптары туралы айтып, оқуды ұсынды. «Қара шаңырақ» ұлттық құндылықтарды нәсихаттау клубы мен «Қыз­ғал­дақ» қыздар клубының танымдық кездесу­лері де іс-шарадан тыс қалған жоқ.

өнерлі балалар

Ал Америкада тұратын қазақстандық сурет­ші, ақын Серік Күлмешкеновтің кітабының тұсаукесері тіптен қызықты өтті. Белгілі гра­фика­лық суретші, мультфильмші, экслибрис­тердің авторы, фотограф, ақын Целиноградта дүниеге келген. С.Күлмешкеновтің «Уақытша сағат» поэзия жинағының тұсаукесеріне ол жай­лы естігендерден бастап, достары, сынып­тастары мен әріптестеріне дейін жиналды.

Жалпы, басқосудың ауқымы өте кең болды. Оған шетелдіктердің де көптеп қатысқаны дәлел. Іс-шараға армян, үнді, поляк және түрік мәдени орталықтарының өкілдері қатысып, басы-қасында жүрді. Мәселен, «Ван» армян этномәдени бірлестігі «Армения: тарих және қазіргі заман» атты кітап көрмесін дайындап, көпшілік назарына ұсынды. Армян халқының ежелгі әліпбиі, армян жазушыларының тарихы, сәулеті және көркем әдебиеті туралы басылым­дар қызығушылық тудырды.

Polska Jedność қоғамдық бірлестігінің белсенділері қоғамдық полоний кітап көрмесін ұсынды. Қалаға танымал қолөнерші Ольга Белик барлығына кітаптың бетбелгілерін безендірудің қызықты әдістерін үйретіп, поляк өрнектерінің сұлулығы туралы айтты. Балалар оның Поляк халық костюмдерінің эскиздерін безендіру туралы ұсынысын қуана қабылдады. Барлық мастер-класс қатысушылары эксклю­зивті дәптерлер түрінде сертификаттар мен сыйлықтар алды. Бұған қоса, Үндістанның мәде­ни орталығы өз кітаптарын қала кітапхана­ларына сыйға тартты. Астанадағы орыс үйі байқауларға қатысушыларды марапаттаса, «Наз» мемлекеттік би театры, Еркеғали Рахмадиев атындағы Мемлекеттік академиялық филармония мен елордалық Қуыршақ театры қатысушылардың барлығын өз шығарма­шылығымен қуантты.

Қызықты өткен іс-шара жалғассыз қалмай­ды. Әр жыл сайын бір рет балаларға арналып кітапхана түні өтеді. Соңғы кездері бұл игі бастамаға елшіліктер мен әр мемлекеттің мә­дени орталықтарының қызығушылығы еселеп арта бастаған. Балалар да белсенді. Сол себепті ұйымдастырушылар мұндай іс-шараларды көптеп өткізуді қолға алуға тырысып отыр.

Байқау айқын
Байқау айқын
Aikyn.kz | Бүгінгі жаңалықтар. Әлем және Қазақстан жаңалықтары.