Асқар Забикулин 16 қараша күні Момышұлы даңғылындағы көп қабатты үйден шыққан өрт кезінде 80 жастағы әже мен оның 22 жастағы немересін құтқарды, – деп хабарлайды Azattyq Ruhy.
Бүгін оны емдеп жатқан дәрігер Павел Кутиков өрт сөндіруші өте ауыр халде жатқанын айтты.
«Бірден айтайын, науқастың жағдайы өте ауыр. Өйткені, денесінің 80 пайызы күйген. Беті сау, ішінің терісі сау, аяғы күймеген. Саны күйген. Өрт сөндіруші жанып жатқан пәтерге кіргенде маска тақты ма, жоқ па, білмеймін, бірақ маған жеткен ақпаратқа сәйкес, ол адамдарды құтқару үшін шешінген дейді. Жалындаған оттың ішінде оның тыныс алу жолына ыстық ауа түскен. Яғни, былайша айтсақ, денесінің сыртын күйдірген от оның аузын, тамағын, тыныс алу жолын, өңешін, өкпесін күйдірген», – дейді дәрігер.
Қазір оның өкпесі демалсын деп дәрігерлер жасанды тыныс алу аппаратына қосқан. Ағзасы аппаратқа қарсылық танытпасын деп дәрімен ұйықтатып қойған.
Естеріңізге сала кетейік,16 қараша күні Астанада Момышұлы даңғылындағы көп қабатты үйдің 11-қабатында үш бөлмелі пәтер отқа оранған.
