Қолжазбалар және сирек кітаптар ұлттық орталығында «Жазба мұралардың реставрациясы және сақтау сұрақтары» атты ІІ Халықаралық ғылыми-тәжірибелік семинар өтті.
Семинардың көздегені – реставратор, қор сақтаушы мамандардың біліктілігін арттыруға және жаңа технологияларды меңгеріп, тәжірибе алмасуға мүмкіндік беру. Отан және әлем тарихынан сыр шертетін көне жазба мұраларды өскелең ұрпаққа жеткізуде заман талабына сай әдістермен бөлісу.
Халықаралық семинарға республикалық, облыстық, қалалық және басқа да архивтерден келген 40-тан астам архившілер қатысып, реставрация әдістемелері бойынша тәжірибе алмасты.
Ауқымды шара барысында архивтік құжаттарды қалпына келтіру және консервациялау, қағаз құжаттарды қалпына келтіруде заманауи жабдықтарды пайдалану, реставрациялау мәселелері туралы шеберлік сағаты өтті. Тәжірибе бөлімінде Ресей мен Өзбекстан елдерінен арнайы келген реставраторлар шеберлік сағатын өткізіп, баяндама да жасады.
Халықаралық ғылыми семинар нәтижесінде архив саласының қызметкерлері алғысхатпен және сертификатпен марапатталды.
