Екі мыңнан аса адам бірігіп салған картина Әбілхан Қастеев атындағы мемлекеттік өнер мұражайына қойылып, көпшіліктің назарына ұсынылды.
Картинаны салуға әлем жұлдыздары да қатысқан. Ол – World Painting халықаралық әлеуметтік арт-жобасы қатысушыларының туындысы. Ал жобаның бастамашысы – Дәуіт Шайхисламов пен Дана Орманбаева. Экспозиция екі бөлімнен тұрады. Оның біріншісі – Әлем бейнесі, екіншісі – германист, кәсіпкер, ГФР Bundesverdienstkreuz орденінің иегері, коллекционер Ғалия Жүнісалиеваның жеке топтамасындағы картиналар.
Айта кету керек, World Painting идеясы – көркем сурет өнеріне қатысы жоқ адамдардың күшімен үлкен кенеп жасау. Ол екі жыл бұрын пайда болған. Жалпы World Painting бірегей әлемдік акциясы Дүниежүзілік EXPO 2020 Dubai көрмесінде бастау алған көрінеді. Ал биыл 2 ақпанда жоба Гиннестің рекордтар кітабына енді.
