Шымкент қаласы Жұмыспен қамту және әлеуметтік қорғау басқармасының Мүгедектігі бар азаматтар және ардагерлермен жұмыс жөніндегі бөлім басшысы Майра Кәрібаева әлеуметтік желілерде тарап жатқан «Инватакси» қызметінің тоқтауы туралы ақпараттар шындыққа жанаспайтынын айтады. «2023 жылға дейін қаламызда мүгедектігі бар адамдар мен балаларды тасымалдау үшін «Инватакси» және «Әлеуметтік такси» қызметтері жұмыс істеп келді. Мұндай қызмет түрі ең алдымен, жеке көмекшінің әлеуметтік қызметтерін көрсетуге медициналық көрсетілімдер, бөлмеде жүріп-тұруға және серуендеуге арналған кресло-арбамен қамтамасыз ететін медициналық көрсетілімдер бар, мүгедектігі бар адамдар мен балаларға көрсетіледі. Өткен жылы бұл қызмет үшін 585 адамнан өтінім қабылданып, тасымалдау қызметін атқару үшін 28 автокөлік қарастырылған болатын», – дейді Майра Қасымқызы. Ал әлеуметтік такси қызметі жергілікті атқарушы органның шешіміне сәйкес «Инватакси» қызметін алуға медициналық көрсетілімі жоқ, бірақ тірек-қимыл аппараты бұзылған мүгедектігі бар адамдарға ұсынылып келген. Биылдан бастап бұл қызмет түрін монетизациялау сессияда мәслихат депутаттары тарапынан қолдау тапқан. Демек, биылдан бастап әлеуметтік таксидің орнына тірек-қимыл аппараты бұзылған мүгедектігі бар адамдар мен мүгедектігі бар балаларға жүріп-тұруы үшін 5 АЕК мөлшерінде әлеуметтік көмек төленетін болады. Ал аталған мәслихат шешімі қазір әділет органдарында тіркеуге жолданыпты. «Қазір шешімнің тіркеліп, ресми жариялануы күтілуде», – дейді бөлім басшысы.Яғни, «Инватакси» тасымалдау қызметі жұмысын жалғастыра береді. Ал әлеуметтік такси қызметі – 5 АЕК мөлшерінде әлеуметтік көмек төлеміне алмастырылып отыр. Бұл қызметке жүгінушілер тиісті құжаттарды жауапты мекемеге өткізеді. Шымкентте өткен жылы әлеуметтік такси қызметін 700-ге жуық адам пайдаланған. Олар үшін 58 көлік құралы тасымалға қойылып, тегін қызмет көрсеткен. Бұл жұмыстарға бюджеттен 130 млн теңгеге жуық қаржы бөлінген.
Шымкент қаласы