Түркиядағы жер сілкінісінен кейін хабарсыз кеткен Сабина Мамадьярова аман-есен табылды.
Түркияның Антакия, Хатай қалаларында хабарсыз кетті делінген қазақстандықтарды іздеуге шыққан топ Сабина Мамадьярованың аман табылғанын хабарлады. Олардың мәліметіне сүйенсек, отандасымыздың қолы сынған.
«Қазір құтқарушылар үйіндіні аршу жұмысын жедел атқарып жатыр. Өзге азаматтар да Сабина табылған тұстан алыста болмауы керек. Ақпарат пайда болған сәтте-ақ хабарлаймыз» деп хабарлады іздеуші топ өкілдері.
Айта кетейік, Түркиядағы жер сілкінісінен кейін үш қазақстандық азамат хабар-ошарсыз кеткені хабарланған болатын. Astana Hub технопаркінің халықаралық агенті Мирус Құрмашев пен оның екі әріптесі Әділ Қадырбеков пен Сабина Мамадиярова байланысқа шықпай қалды. Бұл туралы Astana Hub бас директоры Мағжан Мәдиев хабарлады.
Сыртқы істер министрлігінің ресми өкілі Айбек Смадияров оларды іздестіру жұмысы жүріп жатқанын және өзі де Хатай қаласына аттанғанын хабарлады. Astana Hub басшысы олардың орналасқан жері туралы бірнеше белгі анықталғанын айтты.
