Тағдырға мойымай, төзімділік пен табандылықтың арқасында алға қойған мақсатына жетіп, әлемдегі мүмкіндігі шектеулі жандардың біз ойлағандай емес екенін ісімен дәлелдеп жүрген Әли Тұрғанбековті бүгінгі күннің батыры десек қателеспейміз. Ерік-жігері мен қайтпас-қайсар мінезін көріп көпшілігі оны «қазақстандық Ник Вуйчич» деп атап кеткен. Ал атақты мотиватор Вуйчичті Әли өзінің кумирі санайды. Мұны дарынды баланың әңгімесінен байқадық.
12 жастағы балақайдың талабы таудай. Бұған дейін көптеген футбол жұлдызымен кездескен Әли Тұрғанбеков әр кездесуінен ұмытылмас ерекше әсер алғанын айтты.
– Мен бірінші Нұр-Сұлтанға халықаралық шараға қонақ ретінде келген кумирім австралиялық мотиватор Ник Вуйчичпен таныстым. Ал футболшылардан алғаш рет Диего Марадонаны көрдім. Ол кезде атақты футболшы Дубайдағы «Фуджейра» футбол командасын жаттықтырып жүрді. Марадонамен футбол ойнадым, ал әкем онымен спорт тақырыбында сөйлесті. Одан соң франциялық ПСЖ командасының жаттығу базасында болдым. Футболшылармен бірге жаттығу жасап, естелікке фотоға түстім. Ал мен үшін ең ерекше есте қалған кез – УЕФА суперкубогын табыстаған сәт. Әлі күнге дейін алаңға шыққаным есімнен кетпейді. Кубокты тапсырып болған соң барлық футболшылармен амандастым. Олар маған сәттілік тілеп, басымнан сипады. Ол сезімді сөзбен айтып жеткізу мүмкін емес, – дейді ол.
Әли сондай-ақ әлемнің ең үздік футболшысы Лионель Мессимен, 2014 жылғы «Алтын доп» иегері украиналық Андрей Шевченкомен, ағылшындық «Манчестер Сити» командасының ойыншысы Александр Зинченкомен, испандық футболшы, «Әл-Садд» футбол клубының жаттықтырушысы Хавимен, «Ливерпуль» ойыншысы Мұхаммед Салахпен және т.б. бірқатар танымал футболшылармен бірге доп тепті.
Таяуда мадридтік «Реал» футбол клубының ойыншысы, 2018 жылғы «Алтын доп» сыйлығының иегері Лука Модричпен жүздесті. Оның тағы бір ерекше кездесулерінің бірі UFC чемпионы Хабиб Нурмагомедовпен өтті. Әли Тұрғанбеков ресейлік спортшы Хабибпен бетпе-бет жолығып, өзінің арманына қол жеткізді. UFC сарбазына «Пари Сен-Жермен» ойыншыларының қолтаңбасы бар допты тарту етіп, танымал спортшымен фотоға түсті. Шара барысында екеуі футбол ойнады. Танымал блогер Саваның ұйымдастырған аталған кездесуін еліміздегі бірқатар басылыммен қатар әлемдік БАҚ өкілдері де жарыса жазды.
Хабибпен таныстық Әлиге бес мәрте «Алтын доптың» иегері Криштиану Роналдумен кездесуге жол ашты. Тіпті, Әлимен кездесу туралы «Ювентус» командасы мен Португалия құрамасының шабуылшысы өзінің Instagram парақшасында жазды. Әли «Ювентус» командасының ойыншысымен бірге доп тепкеннен кейін, естелікке отандық «Қазақстан» шоколадын тарту етті. Ал португалдық футболшы кішкентай жанкүйеріне қолтаңбасы бар доп сыйлады.
«Манчестер Сити», «Челси» және «Бавария» клубтарынан шақырту алып отырмыз. «Ақсүйектермен» кездесуді футболшы Маркос Алонсо ұйымдастыратын болды. Мюнхенге барар жолымызды көтеретін демеуші іздестірудеміз.
Өмірге деген құштарлығымен әлемді тамсандырған Әлидің ерлігін Президент Қасым-Жомарт Тоқаев та жоғары бағалайтынын жеткізді. Мемлекет басшысы өз кезегінде «Әли, сенің мақсатқа жету жолындағы күш-жігерің әлемдегі талай адамды алға жетелейді. Барлық армандарың орындалсын» деген тілегін білдірген болатын. Мәдениет және спорт министрі Ақтоты Райымқұлова да Әли Тұрғанбековтің өмірге деген құлшысына тәнті екенін ерекше атап өтті.
Айта кетейік, оның ата-анасы Азамат Тұрғанбеков пен Ақмарал Әміреева білікті мамандармен кеңесіп, баласының болашағы үшін 2015 жылы Талдықорғаннан Нұр-Сұлтан қаласына көшіп келген. Нұр-Сұлтан қаласындағы «Нұрорда» мектебінің басшылығы да Әли мен оның бауыры Әмірге қолдау танытып, аталған білім ордасында тегін оқытуға келісім берген.
– Елордаға келгелі алға қойған мақсаттарыма ақырындап қол жеткізудемін. Талдықорғанда жоғары деңгейдегі сапалы алаңдар жеткіліксіз болатын. Үйлер, дүкендер мен мектептердің көбінде арбалы адамға қолайлы пандус жоқ, жаяуға арналған жолдың өзі арбамен жүруге ыңғайсыз еді. Сол себепті біз осыдан 5 жыл бұрын елордаға көшіп келдік. Бұл өте дұрыс шешім болды. Мені көпшілік белгілі футболшылармен кездесуім арқылы біледі. Расында да, спорттың мен үшін орны бөлек. Қолым бос кезде футбол ойнаймын және жүзуге барамын. Футболмен – әуесқой, ал жүзу спортымен кәсіби түрде айналысып жүрмін. Болашақтағы басты арманым – жүзу спортынан әлем чемпионы Майкл Фелпс секілді спортшы болу, – деп жалғады ол әңгімесін.
Біз кездесу барысында Әлидің әкесі Азамат Тұрғанбековті де әңгімеге тарттық. Ол ұлының болашағынан көп үміт күтетінін айтып, алдағы жоспарларымен бөлісуді де жөн санады.
– Әли қазір жүзуге барып жүр. Оның үлкен армандарының бірі – паралимпиаданы жеңу. Сол үшін жаттығудан қалмай, өз-өзін шыңдау үстінде. Оған дейін әлі біраз уақыт бар. Яғни, ендігі паралимпиада 2028 жылы өтеді. Ол кезде Әли де 20 жаста болады екен. Жүзуге барып жүргеніне 2 жылға жуық уақыт болды. Барыс аренаға келіп, жаттығу жасап жүргенімізге жарты жыл болды. Мұндағы жаттықтырушыларға ризамыз. Дәулет Балташ пен Эльмира Ибрайым секілді қос бапкерінен баламның әлі де үйренері көп. 23 сәуірде жүзуден Қазақстан біріншілігі басталады. Соған қатысамыз деп ниеттеніп отырмыз. Алдағы жоспарларымызға келер болсақ, жуырда «Манчестер Сити», «Челси» және «Бавария» клубтарынан шақырту алып отырмыз. «Ақсүйектермен» кездесуді футболшы Маркос Алонсо ұйымдастыратын болды. Мюнхенге барар жолымызды көтеретін демеуші іздестірудеміз. Ал «Манчестер Сити» сапары әзірге белгісіз болып тұр. Өйткені оларға таяуда дисквалификация жасалды. Сондықтан кездесу уақыты нақтыланған жоқ. Майкл Фелпстан да шақырту алғанбыз. Бірақ ол жаққа барып-келу де оңай емес. Жол алыс. Бразилиялық футболшы Рональдиньо да кез келген уақытта Әлимен кездесуге дайын екенін айтты, – дейді Азамат Тұрғанбеков.
Кездесуден соң Әлимен естелікке фотоға түсіп, жігерлі баланың талабына тәнті болып, мақсатты жүзеге асыру жолындағы ұмтылысы мен құтты қадамына сәттілік тіледік.
Абылайхан ЖҰМАШ
Әли сондай-ақ әлемнің ең үздік футболшысы Лионель Мессимен, 2014 жылғы «Алтын доп» иегері украиналық Андрей Шевченкомен, ағылшындық «Манчестер Сити» командасының ойыншысы Александр Зинченкомен, испандық футболшы, «Әл-Садд» футбол клубының жаттықтырушысы Хавимен, «Ливерпуль» ойыншысы Мұхаммед Салахпен және т.б. бірқатар танымал футболшылармен бірге доп тепті.
Таяуда мадридтік «Реал» футбол клубының ойыншысы, 2018 жылғы «Алтын доп» сыйлығының иегері Лука Модричпен жүздесті. Оның тағы бір ерекше кездесулерінің бірі UFC чемпионы Хабиб Нурмагомедовпен өтті. Әли Тұрғанбеков ресейлік спортшы Хабибпен бетпе-бет жолығып, өзінің арманына қол жеткізді. UFC сарбазына «Пари Сен-Жермен» ойыншыларының қолтаңбасы бар допты тарту етіп, танымал спортшымен фотоға түсті. Шара барысында екеуі футбол ойнады. Танымал блогер Саваның ұйымдастырған аталған кездесуін еліміздегі бірқатар басылыммен қатар әлемдік БАҚ өкілдері де жарыса жазды.
Хабибпен таныстық Әлиге бес мәрте «Алтын доптың» иегері Криштиану Роналдумен кездесуге жол ашты. Тіпті, Әлимен кездесу туралы «Ювентус» командасы мен Португалия құрамасының шабуылшысы өзінің Instagram парақшасында жазды. Әли «Ювентус» командасының ойыншысымен бірге доп тепкеннен кейін, естелікке отандық «Қазақстан» шоколадын тарту етті. Ал португалдық футболшы кішкентай жанкүйеріне қолтаңбасы бар доп сыйлады.
Кездесуден соң Әлимен естелікке фотоға түсіп, жігерлі баланың талабына тәнті болып, мақсатты жүзеге асыру жолындағы ұмтылысы мен құтты қадамына сәттілік тіледік.
Абылайхан ЖҰМАШ