Режиссер Рүстем Әбдірашовтың «Қазақ хандығы. Алтын тақ» тарихи фильмі 2020 жылғы ақпанның 26 мен 4 наурыз аралығында Үндістандағы Карнатака штаты, Бангалор қаласында өтетін XXI Bengaluru international film festival кинофестивалінің Asian Cinema Competition бағдарламасына қатысады.
Карнатака штаты үкіметінің тапсырысы бойынша Chalanachitra академиясымен ұйымдастырылған үнді кинофестивалі Азия және үнді киносының конкурстық бағдарламаларын қамтиды, сондай-ақ фестивальдың «Әлемдік панорама» сынды конкурстан тыс бағдарламасы шеңберінде FIPRESCI және NETPAC жүлделерінің жеңімпаз фильмдерінің көрсетілімі ұйымдастырылады. Жыл сайын фестивальға 50 елден 200-ден астам фильм қатысады.
Естеріңізге сала кетейік, «Қазақ хандығы. Алтын тақ» тарихи картинасы – «Қазақ хандығы» телехикаясының екінші маусымының кино нұсқасы. Бұл ауқымды тарихи жоба Ұлы дала үшін күрес және қазақ мемлекеттілігінің құрылуы туралы баяндайды. Тарихи кино дилогиясы Ілияс Есенберлиннің «Көшпенділер» трилогиясындағы алғашқы «Алмас қылыш» романына негізделген.
Фильмді Қазақстан Республикасы Мәдениет және спорт министрлігінің тапсырысымен Ш.Айманов атындағы «Қазақфильм» киностудиясы Centaurus Rustem Abdrashev production компаниясымен бірлесіп түсірді.
Әділ БЕК
