Танымал суретші Ерболат Төлепбай «Ұмай ана» картинасын сатып, 10 млн теңгені Түркиядағы жер сілкінісінен зардап шеккендерге аударды.
Бұдан бұрын ол «Қазақ өнерінің Түркияға көмегі» акциясын бастап, зергер, суретші, әнші, актер, ақын, жазушы сияқты мәдениет және өнердегі әріптестерін іс-шараға белсенді атсалысуға шақырған еді.
Оның айтуынша, сын шақта жедел аукцион ұйымдастырып, түскен қаражатты Түркияға жолдаған. Аукцион өткізуге Қанат Төлеметов, Рүстем Қараев, Ержан Омаров, Виталий Ким, Азамат Сырғабаев секілді азаматтар көмектескен. Осылайша, аукционға қойған «Ұмай ана» картинасын аталған бес жігіт бірігіп, 10 млн теңгеге сатып алған.
«Бұл – өте сапалы салынған біртуар шығармамның бірі. Атымтай жомарт бес жігіт қосылып, аукцион кезінде картинаны 10 миллион теңгеге бағалады. Олар ақылдаса келе шығарманы да Түркия тарапына сыйлық ретінде тапсыруға шешім қабылдады. Содан Түркияның Алматыдағы Бас консулдығына барып, 10 миллион теңгені Түркиядағы апаттан зардап шеккен бауырларымызға көмек ретінде аудардық. «Ұмай ана» картинасын да табыстадық», – деді ол.
