8 наурыз – Халықаралық әйелдер күніне орай елордадағы мәдениет, білім, спорт мекемелерінде түрлі мерекелік іс-шара, қайырымдылық акциясы өтеді.
7 наурыз күні «Жанұя» отбасы институтын қолдау орталығында түрлі салада жұмыс істейтін әйелдерді марапаттау рәсімі өтеді. Сондай-ақ «Шуақты көктем» іс-шарасында көпбалалы аналар салтанатты түрде «Алтын алқа», «Күміс алқа» алқаларымен марапатталады.
Мәдени іс-шараларға келсек, «Наз» мемлекеттік би театрында «Жан ана» концерті ұйымдастырылады. «Жастар» театры Н.Жақыпбайдың «Жанарымдағы жалғыз әуен» деген театрландырылған концерттік бағдарламасын ұсынады. «АЛЖИР» мемориалдық-мұражай кешенінде «Ана – өмірдің гүлі» көрмесі ұйымдастырылады.
7 және 8 наурызда қалада «Қамқорлық мекенжайы» акциясы аясында көпбалалы аналарға, жалғызбасты қарттарға азық-түлік себеті таратылады. Оған қоса Ұлы Отан соғысының тыл ардагерлерін құттықтайды.
Мереке күндері – 6, 7, 8 наурыз күндері қала көшелерінде әйелдерге қызғалдақ тарату акциясы өтеді.
11 наурыз күні сағат 12:00-де Е.Рахмадиев атындағы мемлекеттік академиялық филармонияда «Super Әже» байқауы өтеді.
Наурыз айында қала кітапханаларында шығармашылық көрме, конкурс, әдеби экспозиция және тағы басқасы қойылады.
